Нұр-Сұлтан, BAQ.KZ. Жұмыртқа өндірушілерді қолдау көлемін арттыру туралы шешім қабылданды. Бұл туралы Түркістан облысында өткен республикалық семинар-кеңесте Ауыл шаруашылығы министрлігінің басшысы Ербол Қарашөкеев мәлімдеді.
Әлемдік азық-түлік нарықтарындағы тұрақсыз жағдайға байланысты және отандық құс фабрикаларын қолдау, ішкі нарықтың тұрақтылығын сақтау мақсатында ауыл шаруашылығы министрлігі жұмыртқа өндірушілерді қолдау көлемін ұлғайту туралы шешім қабылдады.
Ауыл шаруашылығы министрлігі асыл тұқымды мал шаруашылығын дамытуды, мал шаруашылығының өнімділігін және өнім сапасын арттыруды субсидиялау қағидаларына тағамдық жұмыртқаны субсидиялауды енгізу бөлігінде өзгерістер мен толықтырулар енгізіп жатыр.
Ереже жобасында жұмыртқа өндірісінің құнын арзандатуға арналған субсидиялар нормативін екі есе ұлғайту көзделген, ол құс фабрикасының қуатына қарамастан, бір данасына 3 теңгені құрайды. Осылайша, қолдау шарасымен еліміздің барлық жұмыртқа құс фабрикалары қамтылатын болады, оларды субсидиялауға 6,5 млрд теңге бөлінеді, - делінген АШМ баспасөз қызметінің хабарламасында.
Республикада 63 құс фабрикасы бар, оның ішінде 29 – ет және 34 – жұмыртқа бағытында. 2021 жылдың қорытындысы бойынша отандық құс фабрикалары сойыс салмақта 266,8 мың тонна құс етін өндірді, бұл жалпы өндіріс көлемінің 98 % құрайды. Тауық жұмыртқасы 3,5 млрд дана немесе жалпы өндірістің 74% өндірілді. Құс етімен қамтамасыз ету 66%-ды құрайды, импорт үлесі 45%-дан 39,5%-ға дейін төмендеді. Ел тағамдық жұмыртқамен 98% қамтамасыз етілген.
