Ағымдағы жылдың 4 айында Қазақстан Республикасы Қаржы министрлігінің Ішкі мемлекеттік аудит комитетінің Жамбыл облысы бойынша Ішкі мемлекеттік аудит департаменті 20 аудиттік іс-шара өткізді, деп хабарлайды BAQ.KZ.
Қаржы министрлігінің Ішкі мемлекеттік аудит комитетінің мәлімдеуінше, олардың ішінде бір іс-шарат тізім бойынша және 19 жоспардан тыс тексеру болған.
Бұл жоспардан тыс тексерулердің бесеуі Комитеттің тапсырмасы бойынша, ал он төрті заңды және жеке тұлғалардың өтініштері бойынша жүргізілді.
Аудиторлар жалпы сомасы 3 955 672,3 мың теңгеге бұзушылықтарды анықтады. Оның ішінде қаржылық бұзушылықтар 1 851 393,6 мың теңгені, ал рәсімдік сипаттағы бұзушылықтар 2 104 278,7 мың теңгені құрады. Рәсімдік бұзушылықтардың едәуір бөлігі мемлекеттік сатып алуларға қатысты 1 921 600,7 мың теңгені құрады.
Қаржылық бұзушылықтардың жалпы сомасынан бюджетке қалпына келтіру және өтеуге жататын 1 851 393,6 мың теңгеден аудит барысында және қабылданған шаралармен 228 645,0 мың теңге қалпына келтіріліп, бюджетке өтелді, бұл жалпы соманың 12,3%-ын құрайды.
Аудиттік іс-шаралардың нәтижелері бойынша тексерілген ұйымдар мен мекемелердің 12 лауазымды тұлғасы тәртіптік жауапкершілікке тартылды. Әкімшілік жауапкершілікке 10 лауазымды тұлға тартылып, оларға 4 319,7 мың теңге айыппұл салынды, бұл айыппұлдар толық көлемде бюджетке өтелді.
Сонымен қатар, төрт аудиттің жалпы сомасы 1 440 477,9 мың теңгеге материалдары одан әрі қарау үшін прокуратура органдарына тапсырылды.
Осылайша, Департамент ұйымдардағы қаржылық және рәсімдік тәртіпті бақылауды күшейте отырып, анықталған бұзушылықтарға уақытылы ден қоюдың маңыздылығын, қаржылық шығындардың алдын алу және мемлекеттік сатып алулардың ашықтығын қамтамасыз етуді ерекше атап өтті.
