Украина президенті Владимир Зеленский АҚШ-пен пайдалы қазбаларды өндіру жөніндегі келісімнен шығуға ниетті. Бұл туралы жексенбі күні журналистермен әңгіме барысында Ақ үй басшысы Дональд Трамп мәлімдеді, деп хабарлайды BAQ.KZ тілшісі Reuters-ке сілтеме жасап.
Трамптың айтуынша, егер Зеленский бұл келісімнен бас тартуға тырысса, оны үлкен қиындықтар күтіп тұр.
Ол сирек кездесетін металдар жөніндегі келісімнен бас тартқысы келеді, егер ол мұны жасаса, оның үлкен, өте үлкен проблемалары болады, – деді республикашыл саясаткер.
Сондай-ақ, Трамп Зеленскийдің Украинаны НАТО-ға мүшелікке өткізгісі келетінін, бірақ оның ешқашан жүзеге аспайтынын түсінетінін айтты.
Ол НАТО мүшесі болғысы келеді. Бірақ ол ешқашан НАТО мүшесі болмайды, ол мұны түсінеді, – деді Ақ үй басшысы.
Бұған дейін Жоғарғы Рада депутаты Ярослав Железняк АҚШ ұсынған Украина ресурстары жөніндегі жаңа келісім жобасы елдің мүддесіне сай емес екенін мәлімдеген. Оның айтуынша, құжат АҚШ-тың Украинадағы барлық пайдалы қазбаларды, соның ішінде мұнай мен газды басқаруға мерзімсіз қатысуын көздейді, бірақ онда Украина үшін қауіпсіздік кепілдіктері туралы ештеңе айтылмаған.
Өз кезегінде Зеленский Вашингтонды келісім шарттарын өзгерткенін айтып айыптады. Сондай-ақ, ол АҚШ-тың бұған дейін берген әскери көмегін қарыз ретінде мойындаудан бас тартты.
Бұған дейін хабарлағанымыздай, Украина АҚШ-тан жер қойнауы туралы келісімді өзгертуді сұрайды.
