Нұр-Сұлтан, BAQ.KZ. Қазақстандық теннисші Зарина Дияс Гонконгтағы ITF сериясындағы турнирдің финалына шықты. Бұл туралы Vesti.kz порталы жазады. Турнирдің жүлде қоры – 25 мың доллар.
Зарина жартылай финалда америкалық теннисші Сачия Викеримен кездесіп, 6:3, 6:2 есебімен жеңді.Зарина Дияс қазір WTA рейтингінде әлемнің 77-ракеткасы, ал 24 жастағы Викери 157-орында тұр.
Екі теннисші осымен үшінші рет ойнап, кездесулердің қорытындысы бойынша 2:1 есебімен Зарина Дияс алда келеді.
Екінші жартылай финалда турнирдің бірінші ракеткасы қытайлық Чжу Линь (72-ракетка) және франциялық Хармони Тан (251-ракетка) ойнап жатыр. Жеңген спортшы финалда Заринамен ойнайды.
Айта кетсек, бұған дейін Дияс ширек финалда грузиялық Екатерина Горгодзені жеңген болатын.
