Мәдениет және ақпарат министрлігі мен Бірыңғай грант операторы 2025 жылға арналған үкіметтік емес ұйымдарға грант беру байқауын жариялады, деп хабарлайды BAQ.KZ ведомствоға сілтеме жасап.
Байқаудың мақсаты – азаматтық бастамаларды қолдау және азаматтық қоғам институттарын әлеуметтік саладағы өзекті мәселелерді шешуге тарту.
Байқау аясында ҮЕҰ екі әлеуметтік сала – "Жастар саясатын және балалар бастамаларын қолдау" және "Отбасылық-демографиялық және гендерлік мәселелерді шешуге жәрдемдесу" бойынша жобаларды ұсына алады.
Грант тоғыз басым бағытты қамтиды:
- Құқық бұзушылықтар мен сыбайлас жемқорлыққа нөлдік төзімділікті насихаттау.
- Қаржылық сауаттылықты арттыру және жастар арасындағы несиеге тәуелділіктің алдын алу.
- Қылмыстық жазасын өтеген жастарды оңалту және бейімдеу.
- Лудоманияның (ойынға тәуелділік) алдын алу.
- Нашақорлық пен есірткі қылмысына қарсы күрес.
- Жастарды азаматтық-патриоттық тәрбиелеу.
- Отбасын қолдау орталықтарына арналған онлайн-психологиялық қызмет ұйымдастыру.
- Медиа арқылы тұрмыстық зорлық-зомбылықтың алдын алу.
- Отбасылық және дәстүрлі құндылықтарды насихаттау, балалар тәрбиесіне ата-аналардың жауапкершілігін арттыру.
Толық ақпарат пен құжаттаманы cisc.kz сайтынан қарауға болады.
