Temu компаниясы Оңтүстік Корея пайдаланушыларының жеке деректерін сыртқа жібергені үшін айыппұлға тартылды, деп хабарлайды BAQ.KZ тілшісі Yonhap News агенттігі несілтеме жасап.
Қытайдың Temu электронды сауда платформасы Оңтүстік Корея пайдаланушыларының жеке мәліметтерін Қытай мен Сингапурға жасырын түрде жібергені үшін айыппұл төлеуге міндеттелді. Бұл туралы бейсенбі күні Оңтүстік Кореяның дербес деректерді қорғау жөніндегі мемлекеттік органы хабарлады.
Жеке деректерді қорғау жөніндегі комиссия (PIPC) сәрсенбі күні өткен жалпы отырыста Temu компаниясына Жеке деректерді қорғау туралы заңды бұзғаны үшін 1,36 миллиард вон (970 мың АҚШ доллары) көлемінде айыппұл салу туралы шешім қабылдағанын мәлімдеді.
Өткен жылдың сәуір айында PIPC Temu және AliExpress платформаларының Оңтүстік Кореяда жеке деректерді жинау және пайдалану тәжірибесіне қатысты тергеу бастады. Бұл екі қытайлық платформа елде белсенді түрде кеңейіп жатыр. Үш айдан кейін комиссия AliExpress-ке 1,97 миллиард вон айыппұл салғанымен, Temu-ға қатысты шешімді кейінге қалдырды, себебі компанияның жергілікті сауда көлемі туралы деректер жеткіліксіз болған.
PIPC дерегінше, Temu өнім жеткізу үшін жеке деректерді өңдеу немесе сақтау міндетін Оңтүстік Корея, Қытай, Сингапур, Жапония және басқа елдердегі бірнеше компанияға жүктеген. Алайда ол бұл ақпаратты жеке деректерді өңдеу саясатында ашып көрсетпеген.
Сонымен қатар, Temu компаниясы серіктес кәсіпорындарға жеке деректерді қорғау шаралары бойынша оқыту жүргізбеген және оларды дұрыс қадағаламаған.
PIPC компанияның 2023 жылдың соңында Оңтүстік Кореядан күніне орта есеппен 2,9 миллион пайдаланушы кіргеніне қарамастан, ішкі уәкіл тағайындамағанын атап өтті. Бұдан бөлек, Temu пайдаланушыларға мүшеліктен бас тартуды қиындатқаны үшін де сынға ұшырады – бұл үшін олардан жеті қадамнан тұратын ұзақ рәсімді орындау талап етілген.
Дегенмен, PIPC Temu жақында бірқатар ерікті түзету шараларын қабылдағанын хабарлады. Атап айтқанда, жеке ақпаратты өңдеу саясатын қайта қарап, ішкі уәкілдер туралы мәліметтерді жариялап, мүшеліктен шығу рәсімдерін жеңілдеткен.
