Мемлекет басшысы «Қазақстан Республикасының кейбір заңнамалық актілеріне тұрғын үй-коммуналдық шаруашылық, кәсіпкерлік және экспорттық-кредиттік агенттіктің қызметі мәселелері бойынша өзгерістер мен толықтырулар енгізу туралы» Қазақстан Республикасының Заңына қол қойғаны белгілі. Заңдағы өзгерістерді BAQ.KZ тілшісі анықтап көрді.
«Қазақстан тұрғын үй-коммуналдық шаруашылығын жаңғырту мен дамытудың қазақстандық орталығы» АҚ төраға кеңесшісі Марғұлан Әбдікәрімовтің айтуынша, аталған заңның ішінде басқару нысандарының түрлеріне өзгерістер енгізілді.
Осы күнге дейін 3 басқару нысаны болса, кеше қол қойылған заңда 2 басқару нысаны көрсетілген.
Оның ішінде, бірінші – мүлік иелері бірлестігі, екінші – барлық меншік иелерінің бірлесіп басқару бірлестігі.
Осы екі нысан бойынша заңның ішінде алгоритмі және қалай жұмыс істейтіні реттеліп жазылған.
Тағы да үлкен мәселе – пәтер иелері кооперативтерінің жұмысын дұрыстау, оның ішінде, олардың басқару субъектісі деңгейіне шығарылғанын айтып кету керек. Яғни пәтер иелері кооперативтері заң күшіне енгеннен бастап жарғы бойынша жұмыс істеуі керек. Осы күнге дейін ПИК-те мұндай жарғы болмаған. Сондықтан заң қабылданғаннан кейін уәкілетті орган екі айдың ішінде нормативтік-құқықтық актілерін қосымша қабылдау керек. Оның ішінде, жаңағы айтып кеткен жарғы бекітілуі тиіс, - деп түсіндірді Марғұлан Жеңісұлы.
Тағы бір айта кететін жайт, мүлік иелері бірлестігіне қатысты бүкіл механизмі бұрынғыша қалады.
Өйткені бұл жерде өздеріңіз білетіндей, сырттан келген адам жоқ. Өзгерістердің ішінде ең бастысы – мүлік иелері бірлестігінің төрағасы үш жылға сайланатын болады. Бұл дегеніміз – үй кеңесі, ревизиялық комиссия және мүлік иелері бірлестігінің төрағасы 3 жылға сайланады. Көппәтерлі тұрғынүйде тұратын халық «мүлік иелері бірлестігін құрмаймыз, өзіміз шешім қабылдаймыз» деуі мүмкін. Бірақ мүлік иелері бірлестігін құрмай тұрып, бір шешім қабылдау керек. Яғни барлық меншік иелерінің басқару жүйесіне кіре отырып, бұл кісілер 36 пәтерден асатын үйде тұрса, міндетті түрде басқарушы компания тартулары керек. Бұған дейін өздері қандай шешім қабылдайды: өздері басқара ма немесе пәтер иелері кооперативтерін жұмысқа шақыруға, болмаса, басқа компанияны тартуға мүмкіндіктері бар, - деді спикер.
Ең басты мәселе – бұл тұрғындар бірінші жиналысты өткізіп, сол кезде шешім қабылдайды.
1) Басқару нысанын қабылдау;
2) Басқару субъектісін таңдау.
Егер тұрғындар бір шешімге келе алмаса, онда әкімдік тарапынан уақытша басқарушы компания тағайындауға мүмкіндігі бар. Ол заңда нақты жазылған және басқарушы компания келіп отырса да, тұрғындарға жұмыстары ұнамаса немесе басқа да олқылықтары болса, басқарушы компанияны ауыстыруға мүмкіндігі мен құқығы бар.
Ең басты шешім жалпы жиналыста қабылданады. Жиналысқа тұрғындардың 51%-ы қатысуы міндеттеледі. Бұл шешім қабылдауға тікелей әсер етеді, - дейді Марғұлан Әбдікәрімов.
