"Қазақтелеком" басшысы Бағдат Мусин алдағы жылдары медицина саласы қалай өзгеруі мүмкін екенін айтты, деп хабарлайды BAQ.KZ тілшісі.
Еске салайық, бүгін АҚШ-тың жаңа президенті Дональд Трамп жасанды интеллектіні дамыту үшін 500 миллиард доллар қаржы бөлді.
Бұл орасан зор қаражат! АҚШ-тағы стартаптарға арналған жылдық венчурлық қаржыландырудан да өте көп сома. Өмір бойы IT индустриясында жұмыс істеп келе жатқан адам ретінде бұл жаңалық мен үшін таңқаларлық, әрі керемет болды. Мұндай өзгеріс күтілген еді, бірақ дәл осындай ауқымда болатынын елестете алмадым. Біздің саладағы ойыншылар үшін көптеген мүмкіндіктер ашылатыны сөзсіз, - дейді Бағдат Батырбекұлы.
Бұрынғы Цифрлық даму министрі болашақта жасанды интеллект саласында қандай өзгерістер болатынын болжады.
Трамптың айтуынша, денсаулық сақтау саласы басым бағыттардың бірі ретінде анықталды. Сондықтан, ең алдымен, денсаулық сақтау туралы айтсақ, әрине, осы саладағы деректерді барынша тез жинақтау үшін бәрі жасалатыны анық. Бұл – медициналық бейнелер, дәрігерлерге жазылу, сауалнамалар, анализдер, диагностика нәтижелері, зерттеулер және фармацевтикалық компаниялардың деректері. Бұл деректерді кез келген форматта сатып алу үшін қаржы бөлініп, деректерді жылдам жинақтай алатын стартаптарға қолдау көрсетіледі. Пациенттердің деректеріне қол жеткізуді реттейтін заңдарда өзгерістер болады, - дейді ол.
Оның сөзінше, алдағы жылдары пациенттер үйінде отырып-ақ анализ тапсыра алады.
Жалпы алғанда, менің ойымша, денсаулық сақтау саласы келесі он жылда нақтырақ дербестендірілген медицинаға көшеді. Бұл дегеніміз, әр пациент өз үйінде отырып, анализ тапсырғаннан кейін, оның дене ерекшеліктерін, дәрі-дәрмекке төзімділігін және үйлесімділігін ескере отырып, арнайы жасалған дәрілерге қол жеткізе алады. Қазіргі таңда қолжетімді миллиондаған дәрі-дәрмектер арасынан таңдау жасаудың қажеті жоқ. Оның орнына, қысқа мерзімде пациентке арналған жеке дәрі жасалады, ал маркетинг мақсатында пациенттің есімі қаптамада көрсетілуі мүмкін, - дейді ол.
Бұған дейін АҚШ президенті Дональд Трамп жасанды интеллект инфрақұрылымын дамыту үшін 500 миллиард долларлық "Stargate" жобасын жариялағанын жазған болатынбыз.
