Бұл жайында Мемлекет басшысы Қасым-Жомарт Тоқаев мәлім етті, деп хабарлайды BAQ.KZ тілшісі.
Ұлттық статистика бюросын нағыз цифрлық ведомствоға айналдыратын маңызды реформаны жүзеге асыру керек. Статистикалық және басқа да деректерді ретке келтіру үшін кешенді шаралар қабылдау қажет. Оның ішінде басқару саясатын әзірлеу, деректердің мақсатты архитектурасын анықтау мәселесін назардан тыс қалдырмаған жөн, – деп мәлімдеді Мемлекет басшысы.
Ол бұл мемлекеттің тиімді шешімдер қабылдауының негізгі шарты болатынын айтты.
5G желісін кең көлемде енгізу инновацияның дамуына тың серпін береді. Бұл процесс Қазақстанда қазірдің өзінде жүріп жатыр, – деді Тоқаев.
Президент 2027 жылға дейін барлық облыс орталықтарын ұялы байланыстың жаңа буынымен қамту міндеті бұған дейін жүктелген еске салды.
Алайда технологияның қарыштап даму жағдайында біз де қарқынды арттыруымыз керек. Үкімет бұл жұмысты мерзімінен бұрын, яғни 2025 жылдың соңына дейін аяқтауы қажет. Әрине, мерзімнің өзгеруі көрсетілетін қызметтердің сапасына әсер етпеуге тиіс. Бұдан бөлек, бұл мақсатқа жету үшін төменгі орбитадағы спутниктік жүйелердің мүмкіндіктерін пайдалана отырып, шалғай аудан тұрғындарын интернетпен қамтамасыз ету маңызды, – деді Ел басшысы.
Сондай-ақ Тоқаев үкімет бұл мәселені жан-жақты пысықтап, қажет болған жағдайда заңнамаға өзгерістер енгізуді тапсырды.
Еске сала кетейік, осыған дейін Президент жасанды интеллект жайында стратегиялық құжат қабылданатынын айтты. Жасанды интеллект адамның тұрмыс салтын басқа арнаға бұратыны туралы да айтылды. Мемлекет басшысы Ұлттық жасанды интеллект платформасын іске қосқан дұрыс екенін де тілге тиек етті.
