Нұр-Сұлтан, BAQ.KZ тілшісі. Тамыз айында ел Президенті Қасым-Жомарт Тоқаев іссапармен Оңтүстік Кореяда болды. Мемлекеттік іссапар кезінде қандай мәселелер талқыланды? Екі ел алдағы уақытта қандай жобаларды жүзеге асырады? Осы және өзге де сұрақтардың шешімін Корея Республикасының Қазақстандағы Төтенше және өкілетті елшісі Ку Хонг-сок мырза айтып берді.
Айта кетсек, Ку Хонг-сок мырзаның Қазақстандағы дипломатиялық қызметіне шамамен бір жылдан асты.
Дипломат журналистерге берген сұхбатында былтыр қызметі басталғанда бірнеше жоспары болғанын, бірақ оны орындай алмағанын айтты.
Былтыр осы жылы маскасыз, қалыпты өмірге оралып, кездесу өткізге уәде берген болатынмын. Бірақ пандемия әлі күнге дейін жалғасып келеді. Жоспардың орындалмағаны өкінішті. Одан басқа, сіздерге бір жылдан кейін орыс тілін үйреніп, еркін тілдесетінім туралы айттым. Өкінішке қарай, бір жыл өтті, мен орыс тілін әлі толық үйрене алмадым. Үйрене алмағанымның басты «сылтауы» – менің жасымның үлкендігінде, - дейді елші.
Сонымен қатар Ку Хонг-сок өзінің Қазақстанға деген ілтипаты арта беретінін бұған дейін сөз еткенін жеткізді.
Мен Қазақстанның өңірлерін аралауға сөз беріп, бұл уәдемді толығымен орындадым. Қызылорда облысы, Түркістан қаласында болдым, - деп айтты ол.
Тоқаевтың Кореяға іссапары жайында
Естеріңізге сала кетсек, 16-17 тамызда Мемлекет басшысы Қасым-Жомарт Тоқаев Корея Республикасына мемлекеттік іссапары барды. Іссапар кезінде елші Тоқаевпен бірге жүрді.
Бұл пандемия басталғаннан бері шет Мемлекет басшысының Корея Республикасына алғашқы сапары болғанын ерекше атап өткім келеді. Сондықтан корей азаматтарының көпшілігі бұл сапарға үлкен қызығушылық танытты. Мемлекеттік сапарға бір күн қалғанда, яғни 15 тамыз күні Оңтүстік Кореяда Ұлттық азаттық күні аталып өтті. Дәл осы күні генерал Хон Бом Доның мүрдесіне отанына қайтарылды, - деп түсіндірді елші өз сөзінде.
Дипломат генерал Хон Бом Доның мүрдесінің отанына қайтарылуына қолдау көрсеткен Қазақстан Үкіметі мен жергілікті корей диаспорасының көмегін айрықша атап өтті.
Өздеріңіз білетіндей, 1937 жылы корейлерді Орталық Азия елдеріне күштеп көшірді. Соның ішінде Қазақстан да бар. Бұл суықтың, аштықтың кезеңі болатын. Олар қазақ жеріне келіп, жергілікті халықтың қамқорлығының, көмегінің арқасында аман қалды. Әрине, корей жұртшылығы бұл туралы жақсы біледі. Осы орайда Тоқаевтың іссапары қазақ халқының жақсылығы мен жылулығын тағы бір рет еске салып, елдердің бауырлас екенін анық көрсетті, - деп айтты Ку Хонг-сок.
Аталған сапар аясындағы Қазақстан үшін тағы бір маңызды іс-шара өткенін атап өтті.
Айта кетейік, Сеулдегі университеттің бірінде қазақтың ұлы ақыны Абай Құнанбаевтың ескерткіші орнатылды.
Мұндай мемлекеттік сапарлар кезінде, әдетте, екі мемлекеттің екіжақты келіссөздері маңызды болып есептеледі. 17 тамызда таңертеңнен кешке дейін екі мемлекет басшысы екі сағатты қоспағанда, уақытты бірге өткізгенін атап өткім келеді. Сондай-ақ кездесу кезінде шай уақыты (tea time) сияқты сәттер болды. Бұл мемлекет басшылары жай ғана еркін жағдайда сөйлескен уақыт. Бұл әдетте 30 минутқа созылады, бірақ мемлекет басшылары келіссөздерге кіріп кеткендері соншалықты, бұл бір сағаттан астам уақытқа созылды. Оларды тіпті кесте бойынша басқа іс-шараларға баруға мәжбүрлеуге тура келді, - дейді Корея елшісі.
Ол қандай мәселелер талқыланғанын айтып берді.
Кездесу барысында Тоқаев жалпылама сұрақтардан бөлек, «Жасыл экономика», 5G ұялы байланысы, электромобильдер сияқты болашаққа бағытталған нақты жобаларды қозғады. Сонымен қатар сапар аясында бизнес өкілдерімен дөңгелек үстелдер де ұйымдастырылды. Әрине экономикалық, энергетикалық серіктестіктен бөлек, адамдар арасындағы байланыс та маңызды. Сол себепті Пусан қаласында Қазақстанның Бас консулдығын құруға шешім қабылданды. Бұл да маңызды шешім болды, - деп айтты дипломат.
Айта кетейік, 23 тамызда Президент Тоқаевтың Пусан қаласында елдің Бас консулдығын ашу туралы Жарлығы шықты.
Корея мәдениетіне қызығатындар үшін жақсы жаңалық
Елші Корея Республикасы мен елшілігі жыл соңына дейін Қазақстанда қандай іс-шаралар өткізетіні туралы айтып берді.
Коронавирус болғанда өте көп іс-шараны өткізуші едік. Айта кетсем, 3 қазанда Корея елінің құрылған күні. Атаулы күнге орай 5 қазанда қонақтардың қатысуымен ресми қабылдау өтеді. Кездесу карантин талаптарын қатаң сақтай отырып ұйымдастырылады. Сонымен қатар 8-9 қазанда Экспо алаңындағы концерт залында корей мәдениетінің фестивалі ұйымдастырылады. Бұл фестиваль 15-16 қазанда Алматы қаласында Республика сарайында жалғасын табады, - дейді дипломат.
Одан бөлек, дипломатиялық іс-шараларды да өткізу жоспарда бар. Оның бірі – Корей түбегі мәселесі бойынша семинар және корей мәдениетіне қызығушылық танытатын жастар үшін викторина, корей тілі бойынша байқау өткізіледі. Бұл іс-шаралар онлайн форматта ұйымдастырылады.
Қазақстанның ұлттық телеарналарында корей сериалдарын көрсетуге бар күшімізді салып жатырмыз. Сондай-ақ келесі жыл екі ел үшін маңызды болмақ. Атап айтқанда, екі елдің дипломатиялық серіктестігіне 30 жыл толады. Осынау жылдық серіктестік мерекесі аясында да біршама іс-шара өтеді, - деп жоспарларымен бөлісті Корея елінің өкілі.
Елші Ку Хон-сок мырза атап өткендей, елшілік өмір қиындығына тап болған жандар үшін қайырымдылық акцияларын өткізіп тұрады. Пандемия кезінде Қарттар үйі, Балалар үйі мен Аналар үйінде қайырымдылық акциясын өткізді. Ол алдағы уақытта да мұндай көмектерді көрсету жалғаса беретінін айтты.
Келесі жылы түрлі мәдени іс-шаралар өтеді. Біз қазақстандықтардың операны жақсы көретінін білеміз. Сол себепті танымал корей опера әншісі Чо Суми мен жастар үшін K-pop топтарын шақырып, концерт ұйымдастыру жоспарда бар. Мұндай шаралар әр қазақстандық үшін қызықты деп ойлаймыз, - дейді ол.
Кореядағы қазақстандық батыр туралы
Елші журналистермен бейресми кездесу барысында Әлиақбар Юлдашевқа қатысты корей халқы қандай пікірде екенін айтты.
Өткен жылы ол Чхусок мерекесімен онлайн құттықтау жолдады. Юлдашев арнайы елшілік үшін өзінің құттықтауын жазды. Кореяда мұндай игі істер мен іс-әрекеттер өте үлкен резонанс тудырады. Сондықтан Әлиақбар мырза Кореяда өте танымал болды. Оның арқасында Қазақстан азаматтарының жергілікті халық алдындағы беделі бұрынғыдан да арта түсті. Корея үкіметі де оның еңбегін мойындады. Өздеріңіз білетіндей, ол бұған дейін елде заңсыз болған және осы әрекетінен кейін Үкімет оған Кореяда заңды түрде тұруға мүмкіндік берді. Қазір ол сол жақта, - деді Ку Хонг-Сок.
Еске сала кетейік, 2020 жылғы наурызда қазақстандық заңсыз еңбек мигранты Әлиақбар Юлдашев өрт кезінде 10 адамды құтқарып қалды. Кейін ол Оңтүстік Корея БАҚ-ының назарында болды. Қазақстан-Оңтүстік Корея: Көші-қон мәселесі елші атап өткендей, заңсыз еңбек көші-қоны екі елдің қарым-қатынасына теріс әсер етеді. Сол себепті алдағы уақытта елдер заңсыз жұмыс істейтіндер санын қырқартуға күш салады.
Әрине, заңсыз көші-қон, заңсыз жұмыс күші мәселелері - Кореядағы әлеуметтік маңызды жоба. Бұл тек Қазақстан Республикасына ғана қатысты емес, өйткені Кореяда басқа елдердің өкілдері көп. Сондықтан бұл елдегі жалпы әлеуметтік мәселе. Әрине, Оңтүстік Корея үкіметі заңсыз мигранттар мәселесін шешуге мүдделі, - деді дипломат журналистермен кездесуінде.
Оның айтуынша, қазіргі күні екі ел аталған мәселені шешу үшін келіссөздер жүргізіп жатыр.
Қазір екі ел заңсыз көші-қон мәселелерін нақты шешу, тәуекелдерді шектеу және Қазақстанның кез келген жас азаматының заңды түрде Оңтүстік Кореяға жұмыс істеуге баруы үшін белсенді келіссөздер жүргізіп жатыр. Бұл мәселелер өте маңызды, біз де өз тарапымыздан бұған күш саламыз, - деп айтты Ку Хонг-сок мырза.
Корей тілі
Корей тілін екі ұйым үйретеді. Бірі – елордадағы Корей мәдени орталығы, екіншісі – Алматыдағы Корей білім орталығы. Пандемияға байланысты оқыту қазір онлайн форматта өтіп жатыр. Бірақ алдағы уақытта дәстүрлі форматқа ауысамыз. Сондай-ақ шетелдік мұғалімдерді тарту да жоспарда бар, - дейді ол.
Қымыз&Шұбат
Оңтүстік Корея елшісі Қазақстандағы алғашқы жылынан алған әсерімен бөлісті.
Қазақстандағы жемістердің көптігіне таң қалдым. Қазақстанға аттанар алдында маған жеміс аз екенін айтқан болатын. Бірақ Қазақстанға келгенде мұның бәрі аңыз болып шықты. Мұнда өте дәмді қауын мен қарбыз бар. Кореяда қарбыз қымбат және Қазақстандағыдай дәмді емес, - деп айтты Ку Хонг-сок.
Елші Қызылорда тұрғындарының қатты ұнағанын айтты. Оның айтуынша, қызылордалықтар мейірімді және ашық.
Одан бөлек, дипломат тағамдар туралы да әсерімен бөлісті.
Оң жағалауда өте дәмді лағман дайындайтын кафе бар. Маған дөңгелек ет кесектері, яғни қазы ұнады. Жылқы етін қуыратын мейрамхана да бар. Жылқы еті маған өте ұнады, дәмі тамаша. Қымыз дәмін татып көрдім, бірақ ол ұнамады, асқазанда біртүрлі сезім пайда болды. Енді шұбаттың дәмін көргім келеді, - деді Ку Хонг-сок.
21 қыркүйекте кореялықтар дәстүрлі Корей мерекесі Чхусокты атап өтеді. Бұл мерекеде отбасы мүшелері бір шаңырақ астында жиналып, жақындарымен көріседі.
