Тоқаев ел бастамаларын қолдаған түрікменстандық дипломатқа ризашылығын білдірді

12 Қазан 2021, 16:02
1874
Бөлісу:
Тоқаев ел бастамаларын қолдаған түрікменстандық дипломатқа ризашылығын білдірді

Нұр-Сұлтан, BAQ.KZ. Қасым-Жомарт Тоқаев Түрікменстан Министрлер кабинеті төрағасының орынбасары – Сыртқы істер министрі Рашид Мередовті қабылдады.

Бұл туралы Ақорданың баспасөз қызметі хабарлады.

Мемлекет басшысы АӨСШК Сыртқы істер министрлері Кеңесінің 6-отырысына қатысу үшін елімізге келген Түрікменстан Министрлер кабинеті төрағасының орынбасары – Сыртқы істер министрі Рашид Мередовті қабылдады.

Мемлекет басшысы Түрікменстан өткізген Орталық Азия мемлекеттері басшыларының үшінші Консультативтік кездесуінде ынтымақтастықты одан әрі күшейту әрі жаңа мүмкіндіктерге жол ашу мақсатымен өзекті мәселелер талқыланғанын атап өтті. Қасым-Жомарт Тоқаев түрікменстандық дипломатқа АӨСШК Сыртқы істер министрлері Кеңесінің 6-отырысына қатысып, Қазақстанның бастамаларына қолдау көрсеткені үшін ризашылығын білдірді.

Кездесуде Қазақстан-Түрікменстан қарым-қатынасының саяси, сауда-экономикалық салалары мен аймақтық қауіпсіздік мәселелері талқыланды. Сонымен қатар Түрікменстанда өтетін VI Каспий саммитіне дайындық барысы қарастырылды.

Рашид Мередов Қазақстан Президентіне қабылдағаны үшін алғыс білдіріп, Түрікменстан Президенті Гурбангулы Бердімұхамедовтің өз еліне мемлекеттік сапармен келуге шақыруын табыс етті.

Қасым-Жомарт Тоқаев шақыртуды қабыл алатынын айтып, барлық саладағы қазақ-түрікмен ынтымақтастығына тың серпін беру мақсатында жуық арада Ашхабадқа сапармен баратынын жеткізді.


Өзгелердің жаңалығы