Отанымызды көркейту – баршаға ортақ парыз. Бұл туралы Мемлекет басшысы Қасым-Жомарт Тоқаев Қазақстан халқы Ассамблеясының XXXIV сессиясында мәлім етті, деп хабарлайды BAQ.KZ тілшісі.
Мұның бәрі Қазақстанды жайлы әрі өмір сүруге қауіпсіз аумаққа айналдыруға бағытталған күш-жігеріміздің нәтижесі. Қастерлі Отанымызды көркейту – баршаға ортақ парыз. Менің бастамаммен былтырдан бері "Таза Қазақстан" акциясы жүзеге асырылып жатыр. Жалпыұлттық жобаға 6 миллионнан астам адам қатысты. 1,6 миллион тоннадан аса қоқыс жиналды. 3,3 миллион көшет отырғызылды. "Таза Қазақстан", бұл – біздің бүгінгі және ертеңгі күніміздің кепілі. Сондықтан жұмыс үздіксіз жалғаса береді, - дейді Қасым - Жомарт Тоқаев.
Президент әр азамат, әсіресе, жастар бойына тазалық, ұқыптылық, жауаптылық сияқты қасиеттерді сіңіруі керегін айтады.
Таза я тазалық, бұл – киелі сөздер. Ары таза адам ешқашан елін сатпайды. Біз "Қазақстан – ортақ үйіміз" деп үнемі айтамыз. Сондықтан еліміз таза, тартымды, мәдениетті болуы керек. Ассамблея бұл идеяны жан-жақты дәріптеп келеді. Бұл – өте тиімді әрі пайдалы жұмыс. Тазалық әр үйден басталуы керек. Сонда ғана "Таза Қазақстан" боламыз. Кішкентай кезінен тазалыққа үйренген бала кейін жауапкершілігі жоғары, саналы азамат болып өседі. Елге жанашыр болады. Сондықтан бүгін мен Қазақстан халқы Ассамблеясының мүшелерін, барлық этномәдени бірлестіктерді "Таза Қазақстан" жалпыұлттық акциясына белсене қатысуға шақырамын, - деді Қасым - Жомар Кемелұлы.
Тоқаевтың сөзінше, "Таза Қазақстан" жобасы жай науқан емес, бұл – өскелең ұрпаққа озық білім мен тәлім-тәрбие беру.
Баршамызға қатысы бар идеологиялық маңызды іске әр қаланың, ауылдың, көшенің және ауланың тұрғындарын жұмылдыру керек. "Таза Қазақстан", бұл – шынайы отаншылдықтың көрінісі. Бәріміз Әділетті, Қауіпсіз және Таза Қазақстанда өмір сүргіміз келеді, - деді Мемлекет басшысы.
Еске сала кетейік, Қазақстан Президенті Қасым-Жомарт Тоқаев Қазақстан халқы Ассамблеясының XXXIV сессиясының пленарлық отырысында алда күрделі кезең келе жатқанын айтты. Президент көк паспортымыздың абырой-беделі көтеріліп келе жатқанын да айтты.
