Қазақстанның қарғын судан зардап шеккен аумақтарына Қырғызстан гуманитарлық көмек жібереді, деп хабарлайды BAQ.KZ 24.kg сайтына сілтеме жасап.
Қырғыз Республикасының Парламент отырысында премьер-министр Ақылбек Жапаров Қазақстанның табиғи апаттан зардап шеккен тұрғындарына қажетті заттар жинала бастағанын мәлім етті.
Қазақстандықтарға Қырғызстанда өндірілген азық-түліктер жіберіледі.
Жапаров атап өткендей, Қазақстан гуманитарлық көмек жіберу туралы өтініммен жүгінбеген. Алайда Қырғызстан 2 ақпан күні түнде Бішкектегі ЖЭО-дағы апат кезінде бауырлас ел көрсеткен қолдау шараларын ұмытпайтынын айтты.
Мен Өзбекстан, Түркіменстан және Қазақстанға алғыс айтқым келеді. Президентіміздің көршілес мемлекеттермен жақсы қарым-қатынасының арқасында олар біз көмек сұрамай жатып, қол ұшын созды, - деді Қырғыз Республикасы Үкіметінің басшысы.
Сонымен қатар ол 8 сәуірде Қазақстанның премьер-министрі Олжас Бектенов Қырғызстанға келетінін айтты.
Бұған дейін хабарлағанымыздай, Астанадан өңірлерге 50 тонна гуманитарлық көмек жіберілді.
