Петропавлда су тасқынынан зардап шеккендерге алғашқы 7 пәтер сатып алынды, деп хабарлайды BAQ.KZ Солтүстік Қазақстан облысының әкімдігіне сілтеме жасап.
Оның біреуіне Косогорда тұрған Валерий және Людмила Беленконың отбасысы ие болды. Облысықа іс сапармен барған Еңбек және халықты әлеуметтік қорғау министрі Светлана Жақыпова және СҚО әкімі Ғауез Нүрмұхамбетов Беленко жанұясында болып, жаңа қоныспен құттықтады.
Жалпы айтып өткен жөн, пәтерді адамдар өздері таңдайды. Баспана беру бағалау жұмыстары мен комиссияның үйді қалпына келтіру мүмкін емес деген қорытындысына байланысты беріліп отырмақ.
Сондай-ақ, Министр Ойқалада қалпына келтіру жөніндегі штабта болып, Солнечный 2 ықшам ауданында салынып жатқан үйлер құрылысының барысымен танысты.
Жаңа жатақханада зардап шеккендермен және «Қызылжар су» қызметкерлерімен кездесу өткізді. Оған қоса, гуманитарлық көмекті қабылдау пунктінде болып, еріктілермен кездесіп, шығынды өтеу туралы арыздарды Egov mobile қосымшасы арқылы қабылдау алгоритмі туралы түсіндерме жүргізді.
