Бұл туралы Жамбыл облысы Білім басқармасы басшысының орынбасары Мұхит Нысанбаев баспасөз конференциясында айтты, деп хабарлайды BAQ.KZ тілшісі.
Балалардың қауіпсіздігін қамтамасыз ету мақсатында мектеп бітірушілерге салтанатты іс-шараны міндетті түрде мектеп қабырғасында және алаңында өткізу міндеттеледі. Оқу-жылының қорытындысында өткізілетін жиынның мақсаты - балаларды ұстаздарды құрметтеуге, ұшқан ұясына қамқор болуға, алған білімдерін пайдалана алуына, әрбір істің нәтижесін қорытындылай білуге, адал азамат болуға тәрбиелеу, - деді басқарма өкілі.
Мұхит Нысанбаев әр мектепке салтанатты шараны креативті идеяларымен ерекше форматта өткізу ұсынылатынын айтты. Мысалы, 1-сыныптан 11-сыныпқа дейінгі оқушылардың фотоларынан слайдшоу әзірлеп, көрсету, бір-біріне арнау жасау, тілек айту, ұстаздар мен білім ұясына алғыс айту әнін орындау, өлең оқу, ата-аналарына 11 жыл бойы алған өнер-білімдерін паш ету секілді барынша жүректен жүрекке жетер креативті идеялармен өткізу ұсынылады.
Сондай-ақ ол салтанатты шараны ұйымдастыру кезінде не нәрсеге рұқсат етілмейтінін атап өтті:
- мерекелік шараға аниматорларды, мерекелік агенттіктерді, жеке студияларды тартуға;
- мерекелік дастархандарды ұйымдастыруға;
- жалға берілетін автокөліктерді пайдалана отырып, қала бойына экскурсиялар өткізуге;
- әкімшілік пен педагогикалық ұжымға сыйлыққа қаражат жинауға рұқсат етілмейтіндігін қатаң ескертеміз!
Оқу-ағарту министрлігі тарапынан 24-25 мамыр күндеріндегі іс-шараларды өткізу туралы ұсынымдардың білім мекемелеріне таратылғанын, балалардың жан-жақты қауіпсіздігін қамтамасыз ету мақсатында мектептерде әр сынып бойынша ата-аналар жиналыстары өткізіліп, ата-аналар чаттарына жадынамалар жолданғанын хабарлаймыз, - деп айтты өңірдің білім басқармасы басшысының орынбасары.
Сонымен қатар басқарма іс-шараларды өткізу барысында ата-аналар тарапынан жауапкершілік танытудың маңыздылығын есте сақтауды сұрады.
