Нұр-Сұлтан, BAQ.KZ. "Цифрлық Қазақстан" мемлекеттік бағдарламасы аясында "Smart City" тұжырымдамасы бойынша "Smart Turkistan" мобильдік қосымшасы іске қосылды. Бұл туралы өңірлік коммуникациялар қызметі хабарлады.
Бүгінгі таңда мемлекеттік қызметтерді жылдам әрі оңай алу цифрлық құралдар арқылы жүзеге асырылуда. Осы орайда, "Smart Turkistan" мобильдік қосымшасы облыс тұрғындары мен қонақтарына қоғамдық қауіпсіздік, коммуналдық қызметтер, транспорт, туризм, денсаулық сақтау, білім беру, кәсіпкерлік саласы, жер қатынастары, такси қызметі, мемлекеттік органдар басшыларына виртуалды қабылдауға тіркелуге мүмкіндік береді.
Сонымен қатар, халықтың тұрғын үй кезегі және тағы басқа сала бойынша қызметтерге, ақпараттарға жылдам әрі қолайлы қол жеткізуіне қолайлы.
Бұдан бөлек, елімізде күн тәртібіндегі бірінші мәселеге айналған коронавируc індеті туралы соңғы жаңалықтар, алдын алу шаралары, облыс әкімдігімен жарияланған ескертпелер, хабарламалар осы мобильдік қосымша орнатылған ұялы телефонға хабарлама ретінде келіп отырады. Қосымша Android әрі Apple Store жүйелеріне қолжетімді.
