Ақмола облысының Атбасар ауданында сібір жарасы тіркеліп, бірқатар округте карантин жарияланды. Министрлік эпизоотиялық ошақты жою шаралары қолға алынғанын мәлімдеді, деп хабарлайды BAQ.KZ тілшісі.
Ауыл шаруашылығы министрлігінің ресми мәліметінше, 2025 жылғы 1 шілдеден бастап Атбасар ауданы Шұңқыркөл ауылдық округіне қарасты Құдықсай шалғынында, ал 3 шілдеден бастап Шұңқыркөл және Ярослав ауылдық округтерінде карантиндік шектеулер енгізілді.
Ауру ошағында мәжбүрлі вакцинациялау және дезинфекциялық жұмыстар жүргізіліп жатыр. Ветеринария саласындағы уәкілетті орган ведомствосы, аудан әкімдігі, санитарлық-эпидемиологиялық қызмет және басқа да құзырлы органдармен бірлесіп, эпизоотиялық ошақты жою бойынша кешенді іс-шаралар жоспары әзірленіп, іске асуда, – делінген министрліктің жауабында.
Мал ұстаушыларға маңызды кеңес
Министрлік өкілдері ауыл тұрғындарына сібір жарасы тіркелген жағдайда келесі шектеулердің болатынын ескертеді:
- Жануарлардың барлық түрін әкелуге, әкетуге және бір орыннан екіншісіне ауыстыруға тыйым салынады;
- Ауру малдың сүтін пайдалануға, етке союға болмайды;
- Мал өнімдерін әзірлеуге және тасымалдауға рұқсат берілмейді;
- Өлген малдың өлексесін ашуға, терісін сыпыруға болмайды;
- Ветеринариялық операциялар тек шұғыл жағдайда ғана жүргізіледі;
- Эпизоотиялық аумаққа бөгде адамдар мен көліктердің кіруіне шектеу қойылады;
- Табиғи су көздерінен мал суаруға болмайды;
- Ауыл шаруашылығы жәрмеңкелерін, көрмелерді және басқа да мал қатысатын шараларды өткізуге тыйым салынады.
Бұған дейін Үкімет отырысында Ауыл шаруашылығы министрі Айдарбек Сапаров Ақмола облысындағы 10-ға жуық малдан сібір жарасы анықталғанын мәлімдеді.
