Нұр-Сұлтан, BAQ.KZ. Шымкент гарнизонының әскери бөлімдерінде төмен температурада және күрделі метеорологиялық жағдайларда әскери техника мен қару-жарақтың үздіксіз жұмысын қамтамасыз ету үшін, қару-жарақ пен әскери техниканы қысқы пайдалану кезеңіне ауыстыру басталды.
Бұл туралы Шымкент гарнизонының баспасөз қызметі хабарлады.
Техниканы қысқа дайындау бірнеше кезеңнен тұрады: әскери техника санына керекті жанар-жағармай материалдарын, сондай-ақ басқа да материалдық құралдарды есептеу, ұйымдастыру құжаттарын әзірлеу, материалдық-техникалық қамтамасыз етуді ұйымдастыру, парктер мен парк үй-жайларын техниканы ауыстыруға және қысқы жағдайларда жұмыс істеуге дайындау, ауыстыру бойынша жұмыстарды орындау, сондай-ақ ауыстыруды қорытындылау.
Әрбір әскери бөлімде алдын ала жанар-жағармай материалдарының барлық түрі, құрал-саймандар мен қажетті қосалқы бөлшектер алынды. Сондай-ақ, әскери қызметшілер жауынгерлік машиналардың әрбір паркінің аумағында тиісті тәртіп орнатады, қоймаларға, парк үй-жайларына ағымдағы жөндеу жүргізеді.
Ауыстыру кезінде техника мен қару-жараққа пайдалану нормаларына сәйкес жөндеу және қызмет көрсету орындалады: әрбір жауынгерлік машинаның барлық торабы мен агрегаты тексеріледі, сүзгілерді жуу және ауыстыру, жанар-жағармай материалдарын ауыстыру, батареяларды жөндеу және оларға қызмет көрсету, сондай-ақ электр жабдығын тексеру жүргізіледі.
Қару-жарақ пен әскери техниканы дайындау жұмыстары кестеге сәйкес жүргізіледі және 10 қарашаға дейін аяқталады.
Маусымдық қызмет көрсету жұмыстарының қорытындысы бойынша қарау жүргізіледі және қару-жарақ пен әскери техниканың, сондай-ақ Парктің дайындығы туралы акт жасалады.
