Шарджада екі қазақстандықтың мәйіті табылды: СІМ тергеу барысын бақылауда

Қазақстанның Сыртқы істер министрлігі BAQ.KZ тілшісінің сауалына жауап бере отырып, Шарджа қаласында (БАӘ) қаза болған Қазақстан азаматтары Ақжан Боханова мен Жұлдыз Боханованың туған-туыстары мен жақындарына көңіл айтты.

Ведомство мәліметінше, Қазақстанның Дубай қаласындағы Бас консулдығы марқұмдардың отбасыларына қажетті консулдық-құқықтық көмек көрсетіп жатыр.

Атап айтқанда, консулдық тиісті құжаттарды рәсімдеуге, сондай-ақ Қазақстан азаматтарының қаза болу мән-жайларын анықтау бойынша Әмірліктердің құзыретті органдарымен өзара іс-қимыл жасауға жәрдемдесуде.

Оқиғаның нақты мән-жайлары әзірге жарияланған жоқ.

БАӘ-нің құзыретті органдары қазақстандықтардың қаза болу жағдайларын анықтап жатыр. Тергеу мүддесіне байланысты қазіргі уақытта қосымша ақпарат жария етілмейді, - деп хабарлады СІМ.

Министрлік қаза болғандардың отбасыларымен тұрақты байланыста екенін және өз құзыреті шеңберінде оларға қажетті көмек көрсетіп жатқанын атап өтті.

Бұған дейін БАҚ-та екі қазақстандық қыздың Шарджада қаза болғаны туралы ақпарат тараған еді. Марқұмдардың туыстары қыздардың зорлықпен өлтірілгеніне күмән келтіргенін айтқан. Алайда бұл ақпаратты ресми органдар әзірге растамады.