Серік Шәпкенов өр суынан кейін жайылмаларда қалған шабақтардың қырылуын тоқтату мақсатында жиын өткізді, деп хабарлайды BAQ.KZ.
Облыс әкімі Серік Шәпкеновтің төрағалығымен өткен әкімдік отырысында қала, аудандардағы атқарылып жатқан жұмыстар пысықталды.
Бүгінге дейін 43,955 млн дана шабақ Жайық өзеніне жіберілсе, 1090 келі өлген шабақ санитарлық талапқа сай көзі жойылды. Оған 517 адам мен 92 техника жұмылдырылды. Жүйелі жұмыстар Махамбет пен Индер аудандарында жүріп жатқанын атап өткен аймақ басшысы, Атырау қаласында мәселені шешуді ұйымдастыра алмай отырған басшылар сынға алынды.
Анықтамалық ақпараттарыңызды алдым, бірақ балық құтқару жұмыстарында жүрген адамдарды көрген жоқпын. Екі аптадан бері жүйелі жұмыс жүргізе алмай отырсыздар. Кеше Соколок арнасына барып, жағдайды көріп қайттым. Судың бетінде өлген балық көп. Бұны табиғи құбылыс деп, қол қусырып қарап отыруға болмайды. Балық құтқару жұмыстарын жүйелеу керек. Дрондарды іске қосып, құрғақ жыраларды анықтаңыздар. Кейін учаскеге бөліп, барлық күшті жұмылдырыңыздар. Уақыт өте тығыз, - деді С.Шәпкенов.
Осы ретте шабақтарды құтқару жұмыстарына әскерилер, кооперативтер мен «Жасыл ел» еңбек жасағы жұмысшыларын тартуды тапсырды.
Қаланың басты қорғаныс құрылымы саналатын Соколок арнасына келген су қайтып, жер дымқыл күйінде жатыр. Бұл көліктің құрғақ жерге жетуіне қиындық тудырады. Облыс әкімі суды ұстап тұру үшін бұл жерді уақытша қапшықпен қоршау қажеттігін айтып, жауапты басшыларға ұйымдастыру жұмыстарын жіті бақылауда ұстауды тапсырды.
