Нұр-Сұлтан, BAQ.KZ. "Серпін - 2050" әлеуметтік жобасы аясындағы бұл грант еліміздің оңтүстік өңірлерінен республиканың 5 облысына барып оқуға ниетті мектеп бітіруші түлектерге арналған. Өткен оқу жылында 5629 грант бөлінген. Соның ішінде 956 грантқа түркістандық талапкерлер ие болған, деп хабарлайды өңірлік коммуникациялар қызметі.
Жалпы "Серпін - 2050" бағдарламасының негізгі мақсаты – халқы тығыз орналасқан Түркістан, Жамбыл, Қызылорда, Маңғыстау, Алматы облыстарынан кадр жетіспеушілігі байқалған солтүстік, батыс және шығыс өңірлерінде оқытып, жұмысқа орналастыру. Яғни оңтүстік мектеп түлектері Шығыс Қазақстан, Батыс Қазақстан, Ақтөбе, Қостанай, Көкшетау, Солтүстік Қазақстан, Павлодар облыстарындағы беделді мемлекеттік университеттерде білім алатын болады.
Соңғы 5 жылда Түркістан облысы бойынша аталған бағдарлама аясында жоғары оқу орындарында білім алып жатқан жастар саны 9 мыңнан асып отыр. Ал, колледждерде 1 329 жас білім алуда. Жалпы Түркістан облысы бойынша бағдарлама аясында 10 364 жас оқуға қабылданған.
Өткен жылы "Серпін" жобасының алғашқы студенттері жоғары оқу орындарындағы оқуларын аяқтады. Соның ішінде Түркістан облысының 320 түлегі бар.
Бұдан бөлек, биылғы жылы Түркістан облысы бойынша жетім және ата-ана қамқорлығынсыз қалған балалардың бітірушілер саны 140-ты құрап, оның 55-і жоғары оқу орнында оқуға ниет білдіріп, грант иегері атанған. Аталған 55 оқушының 35-і өз білімдерімен грант иегері болса, 20 бала талап етілген шекті балды жинап, университет ректорларының жеке гранттары иегері атанып отыр. Қалған оқушыға кәсіптік-техникалық колледждерге таңдаған мамандығы бойынша жолдама берілетін болады. 9-сыныпты бітіріп, колледжде білімін жалғастыруды қалаған оқушылар саны 33 баланы құрап отыр.
