Ішкі істер министрлігі жол қозғалысына қатысушыларға үндеу жасады, деп хабарлайды BAQ.KZ Polisia.kz-ке сілтеме жасап.
Құрметті азаматтар! Жол қозғалысының қатысушылары! Ауа райының нашарлауына, боран мен қарға, көктайғақ пен көрінудің төмендеуіне байланысты қазіргі уақытта 15 облыстың 43 жол учаскесінде автокөліктердің қозғалысына шектеу енгізілді. Республикалық маңызы бар алты мыңнан астам шақырым жолда, яғни көрсетілген санаттағы жолдардың 25%-ында шектеулер енгізілген, - деп атап өтті ІІМ әкімшілік полиция комитеті басқарма бастығының орынбасары Айдын Оразбаев.
Сондай-ақ ІІМ азаматтарды сапарға шығудан бас тартуға шақырды.
Осы орайда біз сіздерді сапарға шығудан бас тартуға шақырамыз. Жолға шығып қойған азаматтарға жабылған жол учаскелеріне жақын орналасқан елді мекендерде тоқтап, ауа райының жақсаруын күтуді ұсынамыз. Тәуекелге барудың қажеті жоқ! Қозғалысқа шектеу енгізілген нақты жол учаскелері туралы "ҚазАвтоЖолдың" ресми Telegram-арнасында, радио, теледидар және басқа да бұқаралық ақпарат құралдарында, сондай-ақ 1403 телефон нөмірі арқылы біле аласыздар. Жолда сақ болыңыздар! – деді ведомство өкілі.
Еске салайық, бұған дейін ІІМ Қарағанды облысында автожолдардағы жағдай күрделі екендігін айтқан болатын. Сондай-ақ Ақмола облысының аумағында 40 блокпост қойылды.
