Нұр-Сұлтан, BAQ.KZ. 2019 жылдың 4 шілдесінен бастап Ресейде режиссер Фархат Шәріповтің «Тұлғалық өсу тренингі» көркем фильмі прокатқа жіберіледі. Бұл туралы Ш.Айманов атындағы «Қазақфильм» АҚ-ның баспасөз қызметі хабарлады.
Ресей Федерациясы аумағында фильм дистрибьюторы - «RFG Distribution» ресейлік компаниясы болып табылады. Картинаны ҚР Мәдениет және спорт министрлігінің тапсырысы бойынша «Қазақфильм» АҚ түсірген. Фильм сценарийі Данияр Сүгіралиновтың «Кирпичи 2.0» романы желісінде жазылған.
«Тұлғалық өсу тренингі»/фильмі ресейлік киножұртшылыққа таныс: 2019 жылдың сәуірінде қазақ кинематография тарихында тұңғыш рет 41-ші Халықаралық Мәскеу кинофестивалінде Гран-приге ие болды. «Үздік фильм» номинациясындағы «Алтын Георгийді» Шәріповке халықаралық қазылар алқасының төрағасы – танымал корейлік режиссер Ким Ки Дук табыстады.
«Ресейлік көрермендер біздің картинаны тамашалайтындарына қуаныштымын. Көрермендер картинаны жылы қабылдайтындарына сенемін», - деді Фархат Шәріпов.
Қырық жасқа келген, орта жас күйзелісін кешіп жүрген банк қызметкері, көшбасшылық қасиеттерді дамыту үшін тұлғалық өсу тренингіне келген Қанаттың оқиғасы ресейлік киносыншыларға ұнады.
