Қырғызстандағы сел: Тасқын су көліктер мен бір отар қойды ағызып әкетті

Қырғызстанның Жалал-Абад облысындағы бірнеше елді мекенде сел жүрді. Табиғи апат салдарынан көшелер мен аулаларды су басты, деп хабарлайды Kaktus.media.

Дереккөзінің жазуынша, сел ұзаққа созылған жауын-шашыннан кейін басталған.

Жергілікті тұрғындар көше бойымен лайлы су ағып жатқан сәт түсірілген видеоларды жариялаған. Роликтердің бірінде тасқын судың тіпті бір отар қойды ағызып әкеткені көрінеді.

Сондай-ақ тұрғындардың айтуынша, ауылдардың бірінде ағын су автокөліктерді де сумен шайып кеткен.

Жалал-Абад облысының жауапты тұлғалары ақпаратты растап, қазіргі уақытта жағдайды бағалау және апат салдарларын жою жұмыстары жүргізіліп жатқанын мәлімдеді.