Атырау облысы Құлсары қаласында тасқын салдарынан бүлінген жолдар қалыпқа келтіріліп жатыр. Жұмыс күзге дейін аяқталады деп жоспарланған, деп хабарлайды BAQ.KZ тілшісі.
Жылыой ауданы тұрғын-үй коммуналдық шаруашылығы, жолаушылар көлігі және автомобиль жолдары бөлімі басшысының міндетін атқарушы Бекет Бозжігітовтың сөзінше қазір аудан орталығындағы Автожолшылар-2 ықшам ауданындағы көшелерді қалпына келтіріп, жөндеу басталған.
Қазіргі уақытта орталық ауруханаға кірме жол, тасқын судан бүлінген Қожанов көшесін қалпына келтіру басталды. Мердігер мекеме – «Казком сервис» ЖШС бекітілді. Қала бойынша су шайған жолдарды қалыпқа келтіруді күз мезгіліне дейін толық аяқтауды жоспарлап отырмыз, - дейді Бекет Бозжігітов.
Қала бойынша келтірілген шығын көлемін есептеу мен оны өтеу де жалғасып жатыр. Қазірге дейін 2637 үйге бағалау парағы таратылған. 2455 баспана иесімен келісім-шарт жасалған. 1402 үй бұзылады. 1053 баспана жөндеуге жатады. Көмекті алғандардың бірі жергілікті тұрғын Айгүл Нұржанқызы.
5 сәуірде жаппай эвакуация деп хабарланғасын, өзіміз ағайын-туманы жағалап Ақтау қаласына кетіп қалдық. 6 сәуірде біздің үйді су басты. Деңгейі 1 метрге жақындап, көтерілді. Су 4-5 күн тұрды. Кейін жағдай тұрақталған соң, үйдері техниканы, киім-кешекті бірыңғайлап, реттедік. Керек жерге құжаттарды тапсырдық. Үйімізге бағалаушылар мен сарапшылар келді. Бәрі өздерінің жұмыстарын жасап кетті. Енді маған қорытындылап шығарып, шығын көлемі жазылған құжатты қолыма берді. Сол бағаға келістім. Ақшам түсті. Үйім жөндеуге келеді екен. Кірісіп, бастап жатырмын. Рет-ретімен бәрі болар деп отырмын, - дейді қала тұрғыны Айгүл Нұржанқызы.
Үй-күйсіз қалғандарды баспанамен қамту үшін Құлсары қаласы Болашақ ықшам ауданында 100 үйдің құрылысы басталған еді. Бүгінде 48 баспананың іргетасы құйылды. Оның ішінде 10 үйде тас қалау жұмыстары басталды. Құрылыс жұмыстары үшін инертті материалдар және құрылыс материалдары жеткілікті. Құрылысқа жергілікті мекемелердің материалдары қолданылуда.
Видео: Атырау облысының ТЖ жөніндегі жедел штабы
Қаржыландыратын қордың талабына сай баспана құрылысына қажет ақшаның 80 пайызы «Қазақстан халқына» қорынан және қалған 20 пайызы жергілікті әкімдіктен бөлінеді. Үйлердің бәрі бір жерде орналасқан. Уақыттың тығыздығына байланысты инженерлік инфраструктурасы тартылып тұрған жерден беру керек болды. Ол аумақта қазір электр желісі мен су желілері бар, - дейді Облыстық құрылыс басқармасының басшысы Нұрберген Құсайынов.
Биыл Құлсары қаласын абаттандыру бағытында 3 ауқымды жоба жүзеге асырылады. Атап айтқанда, ықшам аудандардың аулалары абаттандырылады. Ауылішілік жолдар жөнделіп, балалар ойын алаңы мен спорт алаңдары, сондай-ақ автотұрақ салы жоспарда. Қаланың 11 ықшам ауданындағы 38 көшеде жаяу жүргіншілер мен веложолдар салынып жатыр.
Құлсары қаласында шағын және орта бизнес иелері де зардап шекті. Қазір 325 кәсіпкердің шығынын есептеу жалғасып жатыр. Бұған дейін 17 нысан апатты деп танылған. 14 ғимаратқа күрделі жөндеу қажет. Табиғи апаттан болған шығын залалын өндіру үшін бизнес иелерінің бәрі өтініштерін тапсыру керек. Қажет құжат жайлы жауаптылар толық мәлімет беруде. Залал құны үш негізгі бағыт бойынша есептеледі. Әзірге оны өтеу нақты қашан басталатыны белгісіз.
