Елордада ҚР Ішкі істер министрі Ержан Сәденовтің төрағалығымен Ұлттық ұланның әскери кеңесі өтті, деп хабарлайды BAQ.KZ Polisia.kz-ке сілтеме жасап.
Әскери кеңес отырысының күн тәртібінде Ұлттық ұланның 2024 жылдың бірінші жартыжылдығындағы қызметтік-жауынгерлік қызметінің жай-күйі және жаңадан құрылған бөлімшелерді жасақтау жөніндегі жұмыстың нәтижелері туралы мәселелер қаралды. Отырысты ашқан құқық қорғау ведомствосының басшысы Қазақстан Республикасының Ұлттық ұланы еліміздегі қоғамдық қауіпсіздік пен құқықтық тәртіпті қамтамасыз етуде шешуші рөл атқаратынын атап өтті. Сонымен қатар министр құқықтық тәртіп әскерлерімен байланысты өзекті мәселелерді атап өтті. Атап айтқанда, офицерлер мен сержанттар құрамының жеке құрамымен жасақталмау мәселесі қозғалды.
Әрбір командир бөлімшелердің қызметтік-жауынгерлік қызметін қамтамасыз ету үшін білікті кадрларды іріктеумен айналысуға тиіс. Бас штабқа, әскери бөлімдердің командирлері мен орынбасарларына бос лауазымдарды шұғыл түрде жасақтауды тапсырамын. Жеке құрам үшін қызмет үшін барлық қажетті жағдайларды жасау қажет. Жергілікті атқарушы органдармен, Қорғаныс министрлігінің қорғаныс істері жөніндегі департаменттерімен және бөлімдерімен бірлесіп осы бағыттағы жұмысты жандандыру қажет, – деді ІІМ басшысы.
ҚР Ішкі істер министрінің орынбасары – Ұлттық ұланның Бас қолбасшысы Еркін Ботақанов бірінші жартыжылдықта Ұлттық ұланға жүктелген барлық міндет толық көлемде орындалғанын атап өтті. Құқықтық тәртіп әскерлерінің штаттарына Ақтау, Атырау, Қызылорда, Орал және Қостанай қалаларында жедел мақсаттағы бес батальон енгізілді. Мамыр айында ел Президенті – Қарулы Күштердің Жоғарғы Бас қолбасшысы Қасым-Жомарт Тоқаевтың қатысуымен авиациялық базаның салтанатты ашылуы өткізілді. 3 мыңнан астам әскери қызметші, 160-тан астам автомобиль және арнайы техника, сондай-ақ 7 авиация бірлігі табиғи сипаттағы ТЖ режимі жағдайында су тасқынын жоюға тартылды. Жеке құрамның жалпы күшімен 4 мыңнан астам адам, 600 тонна жүк және 130 тонна гуманитарлық көмек тасымалданды, 5 мыңнан астам азамат эвакуацияланғандығын айтты.
