Бақытбек Сыдықов Қорғаныс министрінің орынбасары лауазымына тағайындалды, деп хабарлайды BAQ.KZ.
Мемлекет басшысының өкімімен Бақытбек Сапарбекұлы Сыдықов Қазақстан Республикасы Қорғаныс министрінің орынбасары лауазымына тағайындалды.
Мемлекет басшысының өкімімен Руслан Нұртөлеуұлы Шпекбаев Қазақстан Республикасы Қорғаныс министрінің орынбасары лауазымынан босатылды.
ҚР Қорғаныс министрлігінің баспасөз қызметі мәлім еткендей, Қазақстан әскерінде генерал-майор Бақытбек Сыдықов әскери училищенің курсантынан бастап, Қарулы күштердің қару-жарақ бастығына дейінгі жолдан өтті. Ол әр жылдары техникалық бөлім және қару-жарақ бойынша жауапты қызметтер атқарды.
«Шығыс» және «Оңтүстік» өңірлік қолбасшылығы әскерлері қолбасшысының орынбасары (қару-жарақ бойынша), Әскери-теңіз күштері бас қолбасшысының орынбасары (материалдық-техникалық қамтамасыз ету бойынша), ҚР Қорғаныс министрлігі Әскери-техникалық саясат департаментінің бастығы болды.
1991 жылы Владикавказ жоғары жалпыәскери командалық училищесін, 1999 жылы Кеңес Одағының маршалы Р. Я. Малиновский атындағы Бронды әскерлер әскери академиясын, 2013 жылы Ұлттық қорғаныс университеті әскери және мемлекеттік басқару факультетін бітірген.
Тәжікстан Республикасының аумағында құқықтық тәртіпті сақтау, мемлекеттік объектілерді күзету және қорғау жөніндегі міндеттерді орындады.
II дәрежелі «Айбын» орденімен, ведомстволық және мерейтойлық медальдармен марапатталған.
Үйленген, 3 бала тәрбиелеп отыр.
