Қазақстан-Британ техникалық университеті (ҚБТУ) және Қазақстан теңіз академиясының (ҚТА) екінші курс кадеттері Нидерландтың Eendracht желкенді кемесімен Атлант мұхитын еңсерді, деп хабарлайды BAQ.KZ.
Бұл бірегей білім беру жобасы олардың теориялық және практикалық дайындығын біріктіріп, болашақ теңіз мансабына маңызды негіз қалады.
ҚТА екінші курс студенттері ерекше сапар жасап, Атлант мұхиты арқылы 3191 теңіз милін (шамамен 5910 шақырым) өтіп, Нидерландтың Eendracht желкенді кемесінде аталған саяхат, ҚТА мен STC Group арасындағы серіктестіктің арқасында оқу бағдарламасының маңызды бөлігіне айналды.
Маршрут Африканың батыс жағалауындағы Кабо-Верде аралынан басталып, Кариб теңізіндегі Кюрасао аралында аяқталды. Бұл тәжірибе кадеттерге мұхиттық жүзу жағдайында теориялық білімдерін қолдануға мүмкіндік беріп, оқыту процесінің маңызды кезеңі болды.
Сапар барысында штурман кадеттер тәулік бойы вахтаға шығып, астрономиялық навигациямен айналысты, ауа райының өзгерістерін бақылап, маршрутты дәл анықтау үшін әртүрлі навигация әдістерін қолданды. Сонымен қатар студенттер мұхиттың флорасы мен фаунасын зерттеп, киттер мен дельфиндермен кездесуді қоса алғанда көптеген қызықты жаңалықтар ашты.
Механик кадеттер машиналық бөлімде жұмыс істеп, дәнекерлеу, токарьлық өңдеу және кеме механизмдерінің жұмысын зерттеу бойынша міндеттерді орындады. Бұл тәжірибе олардың кәсіби өсуі үшін өте маңызды болды, өйткені ол студенттерге кемелердің құрылымын ғана емес, сонымен қатар заманауи жабдықтармен жұмыс істеуді үйренуге мүмкіндік берді.
Біз кадеттерімізбен мақтанамыз. Олар Атлант мұхитын кесіп өтіп қана қоймай, бұл сапарды аңызға айналған Eendracht желкенді кемесінде жүзеге асырды. Бұл кеме олар үшін нағыз өмір мектебіне айналып, командалық рухтың маңызды элементі болды. Желкенді кемеде кадеттер бірлескен жұмысқа үйренеді: бірге желкендерді тартып, кемені дұрыс бағытқа бұрады, түнгі вахтаға шығады және кез келген жағдайда бір-біріне қолдау көрсетеді. Бұл практика оларға кәсіби дағдылармен қатар жауапкершілік, тәртіп және өзара көмек сияқты маңызды қасиеттерді сіңіреді. ҚБТУ Қазақстан теңіз академиясының оқу бағдарламасы халықаралық стандарттарға сай келетін дағдыларды дамытуға бағытталған. Біз кадеттеріміздің білім мен дайындықтың ерекше мүмкіндіктерін алатынына қуаныштымыз және олардың алған тәжірибесі болашақта сәтті теңіз мансабының негізін қалайды деп сенеміз, - дейді Қазақстан теңіз академиясының деканы Рамиль Бикташев.
ҚТА екінші курс кадеттерінің бұл саяхаты олардың кәсіби қалыптасу жолындағы маңызды кезеңге айналды. Бірегей білім беру жоба ҚР Ғылым және жоғары білім министрлігінің, Қазақстан-Британ техникалық университеті басшылығының, тәлімгерлер мен серіктестердің қолдауымен сәтті жүзеге асырылды. Бұл студенттерге құнды практикалық тәжірибе жинап, қазіргі заманғы теңіз саласының талаптарына дайындалуға мүмкіндік берді.
