Жаңаөзеннен келген 60-70-ке жуық адам талаптарын айтып, ҚР Энергетика министрлігі ғимаратының алдына жиналды, деп хабарлайды BAQ.KZ.
Бұл ақпаратты "ҚазМұнайГаз" компаниясы растап, елордаға келген жұмысшылармен келіссөз жүргізу үшін арнайы байланыс тобы құрылатынын жеткізді.
Жиналғандар осыған дейін ҚМГ-нің еншілес компаниясы "Өзенмұнайгаз" АҚ үшін мұнай сервис қызметтерін көрсетуге арналған тендерде ұтылған "БерӘлі Маңғыстау Company" компаниясының бұрынғы қызметкерлері екені нақтыланады.
Биыл 1 сәуірде оларға орташа есеппен 700 мың теңге еңбекақысын сақтай отырып, басқа компанияға жұмысқа орналасу ұсынылды. Алайда, "БерӘлі Маңғыстау Company" компаниясының бұрынғы қызметкерлері тендер нәтижелерін жоюды талап етіп, бұл ұсыныстан бас тартты, - делінген ҚМГ баспасөз қызметінің хабарламасында.
Сонымен қатар, "Самұрық-Қазына" қоры осыған дейін келіп түскен шағымдар бойынша конкурс рәсімдерінде заң ережелерінің сақталуына қатысты тексеру жүргізген болатын. Нәтижесінде заң бұзушылық анықталмады.
Астанаға келгендердің басым бөлігі ҚазМұнайГаз ғимаратының алдында өткен былтырғы пикеттерге де қатысқанын айта кеткен жөн. Ол жолы олар маңғыстаулық басқа мекеме – "Кезби" компаниясының жұмыс көлемін белгіленген рәсімдердерге қарамастан қайтаруды талап еткен.
Қазіргі уақытта ереуілге шыққандардың қалауы өзгеріп, "Өзенмұнайгаз" АҚ штатына жұмысқа орналасуды үзілді-кесілді талап етіп отыр.
Алайда, бұл Жаңаөзендегі жұмыссыздарды кезек бойынша аталған мекемеге жұмысқа орналастыру тәртібіне қайшы келеді. Бұл ережелердің моноқала тұрғындарының талабына сай, жұмыс орындарын әділ бөлу үшін қабылданғанын айта кету керек. Осылайша, елордаға келгендердің талаптарын қабылданған құқықтық рәсімдерге қайшы болуына байланысты орындау мүмкін емес, - делінген ҚМГ баспасөз қызметінің хабарламасында.
Дегенмен ҚМГ-де елордаға келген жұмысшылармен келіссөз жүргізу үшін арнайы байланыс тобы құрылатыны хабарланады.
Бұған дейін "Кезби" ЖШС атқарушы директоры Айгүл Өтешова компания өзінің тапқан 100 пайыз табысының 97 пайызын еңбекақыға беріп отырғандығын мәлімдеген.
Айгүл Өтешова былтырға қарағанда компания жұмыскерлерінің жалақысы 65 пайызға көтерілгенін айтқан болатын. «Кезби» ЖШС директоры міндетін атқарушысы Ержан Кезбаевтың сөзінше, бүгінгі таңда компания 700 миллион шығынға батып отырғандығын айтқан. Айта кетейік, «Өзенмұнайгаздың» мердігер компаниясы «Кезби» мекемесінің бір топ мұнайшысы биліктен өздеріне тең жалақы беруді сұрап келгенін хабарлағанбыз.
