Бұл мәселе Астанада өткен Қазақстан мен Вьетнам арасындағы сауда-экономикалық және ғылыми-техникалық ынтымақтастық жөніндегі үкіметаралық комиссияның 11-ші отырысында қаралды, деп хабарлайды BAQ.KZ.
Қазақстанның Сауда және интеграция министрі Арман Шаққалиев пен Вьетнамның өнеркәсіп және сауда министрі Нгуен Хонг Диен екі ел арасындағы сауда айналымын нығайту жолдарын талқылады.
Арман Шаққалиев өз сөзінде екі ел арасындағы сындарлы диалогты құрудағы үкіметаралық комиссия жұмысының маңыздылығы мен тиімділігін атап өтті. Сондай-ақ, қазақ-вьетнам елдері арасындағы өзара сауда жыл сайын оң динамика көрсетіп отырғанын айтты. Өткен жыл тауар айналымының 85,4%-ға өсуімен аяқталды.
Мемлекет басшыларының өткен жылдың тамыз айындағы кездесуі екі жақты қарым-қатынастарды дамытуға ерекше үлес қосты. Онда экономикалық басымдықтар мен нақты міндеттер айқындалды, оның ішінде алдағы жылдары екіжақты тауар айналымын 1,5 миллиард долларға дейін ұлғайту көзделді, - деп атап өтті Арман. Шаққалиев.
Сауда және интергарция министрі Арман Шаққалиевтің айтуынша, Қазақстан 96,9 миллион доллардан асатын 35 тауар позициясы бойынша Вьетнамға экспортты арттыруды көздеп отыр. Бұл металлургия, мұнай-химия, тамақ өнеркәсібі, химия өнеркәсібі және машина жасау сияқты салалардағы тауарлар. Осы тұрғыда Қазақстан-Вьетнам Іскерлік кеңесін құру мәселесі қазіргі таңда Қазақстанның Сауда-өнеркәсіп палатасы мен Вьетнам Сауда-өнеркәсіп палатасы арасында талқылануда.
Қазақстан Вьетнам нарығына астық, бидай ұны, макарон және кондитер өнімдерін, ет және ет өнімдерін, сүт, жарма және басқа да жоғары сапалы ауыл шаруашылығы өнімдерінің түрлерін жеткізуге қызығушылық танытуда.
Бізде ет өнімдерін жеткізуді ұйымдастыруда үлкен әлеует бар. Бірақ алдымен тиісті стандарттар мен процедураларды әзірлеу, сондай-ақ өнімдердің қауіпсіздік пен сапа талаптарына сай болуын қамтамасыз ету үшін сертификаттау үдерісінен өту қажет, - деді Арман Шаққалиев.
Тараптар жақын арада мал шаруашылығы өнімдерін, сүт және сүт өнімдерін, үй жануарларына арналған азықтарды, желатинді және т.б. экспортталатын ветеринариялық-санитариялық талаптар туралы ақпарат беруге келісті. Вьетнамдық тарап үшін сондай-ақ термиялық өңдеуден өткен ет және ет өнімдері, құс өнімдері (құс еті мен жұмыртқасы), қазақстандық тарап үшін балық және бал.
Бұл ретте Қазақстан құрамында мыс бар электр жабдықтарын шығаратын зауыт құрылысының қазақстандық нарығына шығу перспективаларын зерттеп жатқан вьетнамдық LiOA компаниясымен ынтымақтастықты дамытуға мүдделілік танытты. Сондай-ақ авиация саласында үлкен тәжірибесі бар Sovico Group компаниясымен және еліміздің ірі қалаларында электромобильдер (электромобильдер, электробустар) шығаратын озық зауыт салу мүмкіндігін қарастырып жатқан VinFast компаниясымен де жұмысты жалғастыруға ниет білдірді. Бұл орайда 2017 жылдан бастап 6 жыл ішінде Қазақстанда 600-ден астам жұмыс орнын құрған вьетнамдық Mareven Food компаниясының қызметіне жоғары баға берілді.
Тараптар әлеуетті экспорттық тауарлар тізбесін алмасуға, біздің елде Қазақстан-Вьетнам Іскерлік кеңесін және Вьетнамда Вьетнам-Қазақстан Іскерлік кеңесін құру мәселесін қарауға, сондай-ақ Қазақстан-Вьетнам іскерлік кеңесін ашуға жәрдемдесуге келісті.
Кездесу қорытындысы бойынша Қазақстан-Вьетнам бірлескен үкіметаралық комиссиясының 11-ші отырысының қорытындысы бойынша Хаттамаға қол қойылды. Комиссияның 12-ші отырысы Вьетнам Социалистік Республикасында өтетін болды.
