Қазақстан мен Ресейдің шекарасы 7,5 мың шақырымнан асады. Екі ел арасындағы мемлекеттік шекара сызығында шекаралық белгілерді орнату бойынша далалық демаркациялық жұмыстар жоспарлы режимде жалғасып жатыр, деп хабарлайды BAQ.KZ тілшісі.
Қазақстан мен Ресей арасындағы мемлекеттік шекараны демаркациялау – бұл шекара сызығын жергілікті жерде нақтылап, оны арнайы белгілермен рәсімдеу процесі. Бұл процесс екі елдің тәуелсіздігі мен аумақтық тұтастығын құрметтей отырып, өзара келісім негізінде жүзеге асырылады.
Демаркация тарихы
Делимитация:
• Қазақстан мен Ресей арасындағы шекара 2005 жылы делимитацияланды, яғни картада шекара сызығы нақты анықталып, екі тарап келісімге қол қойды. Бұл келісім 2006 жылдың қаңтарында күшіне енді.
Демаркация жұмыстарының басталуы:
• 2007 жылы Қазақстан мен Ресей шекара мәселелерін шешуге арналған арнайы комиссия құрды. Бұл комиссия шекараны нақтылап, оны белгілеу жұмысымен айналысты.
Демаркация маңызы:
• Құқықтық реттеу: Шекараны демаркациялау екі ел арасындағы шекара режимін реттейді және даулы мәселелердің алдын алады.
• Шекара қауіпсіздігі: Белгіленген шекара арқылы екі елдің шекара қызметтері өз міндеттерін тиімді атқара алады.
• Экономикалық байланыстар: Шекараны нақты анықтау сауда, көлік және логистика саласында ынтымақтастықты жақсартады.
• Жергілікті халыққа әсері: Шекара маңындағы тұрғындар шекарадан өтудің реттелген тәртібіне бейімделе алады.
Қазақстан Республикасының құрлықтық мемлекеттік шекарасын делимитациялау барлық шектес елдермен, яғни Қытай Халық Республикасымен, Түрікменстанмен, Өзбекстан Республикасымен, Қырғыз Республикасымен және Ресей Федерациясымен толығымен аяқталып, тиісті халықаралық шарттарға қол қойылды және олар өз күшіне енді.
Қазақстан Республикасының Ресей Федерациясымен мемлекеттік шекарасын демаркациялау бойынша келіссөздер процесі Бірлескен Қазақстан-Ресей демаркациялық комиссиясындағы Қазақстан Республикасы мен Ресей Федерациясы үкіметтік делегацияларының деңгейінде жүргізіледі.
Бүгінде Қазақстан-Ресей мемлекеттік шекара сызығында шекаралық белгілерді орнату бойынша далалық демаркациялық жұмыстар жоспарлы режимде жалғасып жатыр. Мемлекеттік шекараны халықаралық-құқықтық ресімдеу процесі далалық жұмыстарды және де Қазақстан-Ресей мемлекеттік шекарасын демаркациялау туралы халықаралық шарттың ажырамас бөлігі болатын шекараны демаркациялаудың қорытынды құжаттарын дайындау бойынша жұмыстарды қамтиды. Барлық құжаттар қазақ және орыс тілдерінде дайындалып, серіктеспен келісуден өтеді. Ресеймен мемлекеттік шекараның үлкен ұзындығын (7,5 мың шақырымнан астам) ескере отырып, аталған құжаттарды дайындау, келісу және бекіту бойынша жұмыстардың едәуір көлемі айтарлықтай уақытты талап етеді, - деді Сыртқы істер министрлігі.
Бұдан басқа, Қазақстан-Ресей мемлекеттік шекарасын халықаралық-құқықтық ресімдеу жөніндегі келіссөздер процесі екіжақты екенін айтайық. Оның аяқталу мерзімі тек Қазақстан тарапына ғана емес, серіктестің ниет білдіруіне де байланысты екенін ескерген жөн.
