Бас прокурордың орынбасары Ғалымжан Қойгелдиев Қытай Халық Республикасы Жоғарғы Халық прокуратурасының Саяси департамент бастығы Пань Ицинь ханым бастаған делегациясымен кездесті, деп хабарлайды BAQ.KZ.
Ғ.Қойгелдиев шетелдік әріптестеріне екі ел арасындағы ынтымақтастық барлық бағыттар бойынша, оның ішінде қылмыстық-құқықтық салада қарқынды дамып келе жатқанын атап өтті.
Екі елдің прокуратуралары арасындағы өзара іс - қимыл жоғары деңгейде жүзеге асырылуда, өйткені ол конструктивті және сенімді негізде құрылған, - деп атап өтті ол.
Кездесу барысында шетелдік әріптестерге қазақстандық прокуратура қызметінің негізгі бағыттары, сондай-ақ кадр мәселелері бойынша отандық заңнамадағы соңғы өзгерістер туралы хабардар етті.
Өз кезегінде Қытай тарапы кадрларды даярлау және басқару бойынша өз тәжірибесімен бөлісті.
Пань Ицинь ханым Қытайдың Жоғарғы Халық прокуратурасының кадр саясаты саласындағы жұмысының негізгі бағыттарына тоқталып, тәжірибе және озық практикамен алмасу арқылы екі ел прокурорларының біліктілігін арттыруға қызығушылығын танытты.
Кездесу соңында тараптар өзара қызығушылық тудыратын мәселелер бойынша ынтымақтастықты одан әрі кеңейтуге дайын екендіктерін растады.
