Нұр-Сұлтан, BAQ.KZ тілшісі. Үкімет азық-түлік тауарлары импортын 100% алмастыруды жоспарлап отыр.
Бұл туралы Орталық коммуникациялар қызметі алаңында Премьер-министрдің орынбасары Ералы Тоғжанов 2025 жылға дейін Халықтың табысын арттыру бағдарламасын таныстырған кезде айтты.
Мемлекет басшысының тапсырмасына сәйкес өңдеу өнеркәсібінде 115 мың жұмыс орнын құрумен 690 жоба іске асырылады. Керамикалық плиталар, кальцийленген және каустикалық сода, жылу оқшаулағыш материалдар, арнайы кокс, калий тыңайтқыштары және т. б. сияқты тауарлар импортын толық алмастыруға қол жеткізіледі деп күтіліп отыр, - деді ол.
Тоғжановтың сөзінше, Үкіметтің ең маңызды қадамдарының бірі - азық-түлік тауарларының жүз пайыздық импортын алмастыру.
Бұл елдің азық-түлік қауіпсіздігін қамтамасыз етуге мүмкіндік береді. Былтырдың қорытындысы бойынша нарықтағы азық-түлік тауарларының отандық өндірісінің үлесі 80%-ын құрады. Алты тауар бойынша біз әлі де импортқа тәуелдіміз: алма, шұжық, сүзбе және ірімшік, қант, құс еті және балық, - деп түсіндірді Премьер-министрдің орынбасары.
