Қайтарылған активтер: Астанада мектептер мен оңалту орталықтары ашылды

Сыбайлас жемқорлыққа қарсы іс-қимыл агенттігі журналистерге қайтарылған активтер есебінен салынған әлеуметтік нысандарды таныстырды, деп хабарлайды BAQ.KZ тілшісі.

Жемқорлардан тәркіленген қаражат есебінен салынған жаңа әлеуметтік нысандар қатарында мүмкіндігі шектеулі балаларға арналған балалар орталықтары, мектептер бар. Олардың қатарында Астана қаласындағы №96 және №97 орта мектеп сыбайлас жемқорлыққа қарсы тергеулер нәтижесінде мемлекет бюджетінен қайтарылған қаражат есебінен салынған.

Сол сияқты Астана қаласы әкімдігінің "Психологиялық-педагогикалық түзету кабинеті" де бұрынғы сыбайлас жемқорлық қылмысына тартылған адамнан тәркіленіп, мемлекет меншігіне берілді.

Қайтарылған мемлекеттік активтер қоғам игілігіне қызмет етіп, елдің дамуына үлес қосады. Заңсыз шығарылған активтерді қайтару жұмысы агенттіктің маңызды міндеттерінің бірі болып қала береді. 2022 жылдан бастап қазіргі уақытқа дейін Сыбайлас жемқорлыққа қарсы қызмет мемлекетке жалпы сомасы 1,15 трлн теңгеден астам көлемде мүлік активтері мен қаржыны қайтарды, - деді Сыбайлас жемқорлыққа қарсы іс-қимыл агенттігінің ресми өкілі Данияр Бегайдаров.

Қайтарылған активтер қатарына бизнес-орталықтар, әкімшілік ғимараттар, сауда орындары, тұрғын үйлер, пәтерлер, құрылысы толық аяқталмаған нысандар, жер учаскелері, люкс санатындағы автокөліктер және қаржылық қаражаттар кіреді.

Мемлекет басшысының тапсырмасына сәйкес, Сыбайлас жемқорлыққа қарсы қызмет арқылы қайтарылатын барлық активтер тек мемлекет мүддесіне ғана бағытталатынын атап өткен жөн.

Алматы қаласында “Maisat” бизнес орталығы Қазақстан Республикасының “География және су қауіпсіздігі институты” АҚ меншігіне берілді. Құны 7,9 млрд теңгеден асатын “KaisarTower” бизнес орталығы Қазақ ұлттық қыздар педагогикалық университетінің иелігіне тапсырылды. Құны 800 млн теңгеден асатын әкімшілік ғимарат Т.Жүргенов атындағы Қазақ ұлттық өнер академиясының балансына берілді. Ал Астана қаласында құны 5 млрд теңгеден асатын үш жеке үй Астана қаласы әкімдігінің мүгедектігі бар балаларға арналған “Психологиялық-педагогикалық түзету кабинеті” КММ-ға берілді, - деді Данияр Бегайдаров.

Сонымен қатар, Білім инфрақұрылымын қолдау қорының жұмысы бақылауда тұр, оның арнайы шотына 153,3 млрд теңге аударылды. Қордың қаражаты есебінен барлығы 100 мың оқушы орындық 89 мектептің құрылысы қаржыландырылды. Оның ішінде 61 мектеп пайдалануға берілді, ал 2025 жылы тағы 28 жаңа мектеп салу жоспарланды.