2024 жылы арзан әрі тиімді саяхат жасау үшін не істеу керек? Бұл жөнінде еліміздегі туристік компания басшысы Перизат Бекназардан сұрап көрдік, деп хабарлайды BAQ.KZ тілшісі.
- Қайырлы күн, Перизат ханым. Айтыңызшы, 2024 жылы қай елдерге саяхат жасауға болады?
Қазақтарға демалысқа тиімді ТОП-3 елді атап өтейін. Олар: Турция, Египет, Біріккен Араб Әмірлігі. Түркияға саяхат жасау маусымы – сәуірден басталады. Көбісі біле бермейді, Черногория, Шри-Ланка, Вьетнам, Нячанг секілді елдерге саяхат жасау тиімдірек болады. Басқа елдерге қарағанда бұл жерлердің табиғаты ерекше әрі көп адамға арзан келеді. Өзім де жаттанды елдерді емес, осындай ерекше елді мекендерге саяхат жасауға кеңес берер едім.
- Саяхаттау үшін қазірден дайындалу керек дейсіз ғой...
Әрине, көктемде, жазда ашылатын бағыттарға қазірден бастап бронь жасаған тиімді болады. Себебі өзіңіз білесіз, көпбалалы қазақтарға «барлығы қосылған» тарифімен қонақүй таңдау ыңғайлы. Тағы бір ұсынар тиімді әдісім – ақшаңыздың жартысын салып бронь жасап, қалған соманы демалысқа дейін төлеуге болатын компаниялармен жұмыс жасау. Бұл несие алып, саяхат жасаудан әлдеқайда тиімді.
- Тізбектеген елдер арасында Қытай мемлекеті жоқ. Оған не себеп?
2019 жылы Қытайға саяхат бүкіл әлем бойынша жабылған болатын. Өткен жылдың күзінде саяхатшыларға шекарасын ашып, қонақтарды қабылдауын бастады. Оның үстіне Қытаймен арада визасыз байланыс орнығып жатқанын атап өту керек. Хайнань әлемдегі ауасы таза, шөптері пайдалы ел. Сондай-ақ саяхатшыларымыз онда барып, ем қабылдауына болады. Сондықтан Қытайға саяхаттау екі қоянды бір оқпен атқанмен тең.
- Саяхатқа шығуды жоспарлап отырғандар үшін қандай кеңес бересіз?
Жоспарлап жүрген демалысыңыз болса, ең алдымен шетелге шығу паспортыңыздың мерзімін қараңыз. Шетелге шығуға рұқсатыңыздың бар-жоғын тексеріңіз. Саяхаттап бара жатқан еліңіз туралы ақпараттар алыңыз, зерттеңіз, жоспар құрыңыз. Сондай-ақ туристік фирмаларды таңдағанда жұмыс жасау тәжірибесіне мұқият қараңыздар. Мысалы біздің осы салада қызмет етіп келе жатқанымызға 18 жылдан астам уақыт болды. Бүгінде әлемнің кез келген жеріне саяхатшыларымызды жіберіп, керемет демалыс сыйлап отырмыз.
- Сұқбат бергеніңізге алғыс айтамын!
