Ағымдағы жылдың 6 қыркүйегінде «Қаптаманың қауіпсіздігі туралы» Кеден одағының техникалық регламентіне (КО ТР 005/2011) өзгерістер қабылданды, деп хабарлайды BAQ.KZ.
2012 жылғы 1 шілдеден бастап қолданысқа енген бұл регламент медициналық бұйымдарға, дәрі-дәрмектерге, темекі өнімдеріне және қауіпті жүктерді қоспағанда, қаптаманың барлық түрлерінің қауіпсіздігін реттейді.
Өзгерістердің негізгі мақсаты техникалық регламентті іс жүзінде қолдану барысында анықталған сәйкестікті бағалау терминдері мен рәсімдеріндегі сәйкессіздіктер мен қайшылықтарды жою болып табылады.
Осы уақытқа дейін бірыңғай терминдер және қаптаманың қауіпсіздік стандарттарына сәйкестігін бағалаудың нақты рәсімдерінің болмауы кәсіпкерлер үшін артық талаптарға әкелді. Мысалы, ЕАЭО-ға мүше мемлекеттердің ұлттық заңнамаларындағы айырмашылықтар тауарлардың еркін қозғалысына кедергі келтіріп, қаптаманың сәйкестігін растау процесін қиындатты.
Өзгерістер ЕЭК Кеңесінің 2018 жылғы 18 сәуірдегі № 44 шешімімен бекітілген Үлгілік схемалар негізінде сәйкестікті бағалау нысандары мен рәсімдерін біріздендіруді, дәлелдемелерді талдауды, үлгілерді сәйкестендіруді және сәйкестік туралы декларацияларды қабылдауды қоса алғанда, сәйкестікті бағалау рәсімдеріне қойылатын талаптарды нақтылауды қамтиды.
Бұл өзгерістер қаптаманың сәйкестігін бағалаудың ашық және болжамды процедураларын қамтамасыз етеді және кәсіпкерлік қызметті жүргізу шарттарын айтарлықтай жеңілдетеді.
Бұдан басқа, өзгерістер ЕАЭО деңгейінде белгіленген бірыңғай стандарттарды басшылыққа алатын сынақ зертханалары мен тіркеу органдарының жұмысына да оң әсер етеді.
Енгізілген өзгерістер 2025 жылғы 5 наурыздан бастап күшіне енеді, бұл нарық қатысушыларына жаңа талаптарға бейімделуге уақыт береді.
