Алматы, BAQ.KZ тілшісі.«Лотте Рахат» АҚ басқарма төрағасы Константин Федорец қант тапшылығы өндіріске қалай әсер етіп жатқанын айтып берді.
Оның айтуынша, Украинадағы соғыс басталғалы ЕАЭС құрамындағы Ресей мен Белорус елдері қант экспортына тыйым салған. Ал, отандық қант өндірушілер сұраныстың 30 пайызын ғана қамтамасыз етуге қауқарлы екен.
Қант тапшылығына байланысты құрамында қант бар өнімдер өндірісін азайттық. Оның ішінде Ирис, Барбарис кәмпиттерін өндіруді уақытша тоқтаттық. Қант екі апта болмай, одан кейін қайта пайда болуы мүмкін. Сондықтан Шымкенттегі фабрика кейбір өнімдердің өндірісін уақытша тоқтатты. Бұл кезді пайдаланып жоспарлы жөндеу жұмыстарын жүргіземіз. Шілденің ортасында қант жеткізіледі, міне сол кезде жұмысты жалғастырамыз,-деді ол.
Сонымен қатар ол қантты өзге елдерден жеткізу бойынша келіссөздер тоқтаусыз жүріп жатқанын жеткізді. Қазақстан ЕАЭО құрамында болғандықтан сырттан қант әкелу процесі қиын екен. Оның баж салығы да жоғары болады.
Қазір Үндістанның қантын Белгия арқылы жеткізу бойынша келіссөз жүріп жатыр. Бұл тұрғыда үкіметпен кеңесіп жатырмыз, жалпы бұл ЕАЭС елдерінің үкіметаралық келісімімен шешіледі. Дегенмен біз қанттың біраз бөлігін квотамен кіргізіп берулерін сұрап отырмыз,-дейді Федорец.
Сонымен қатар ол шекалад өнімдерін шығаруға қажетті шикізаттың 96 пайызы сырттан келетінін айтты.
Бізде ұн, май, қант, сүт қана өзіміздікі, қалған шикізаттың барлығы шетелден келеді. Какао, арех, тағы басқа өнімдер Түркия, Өзбекстан, Ветнам сияқты елден жеткізіледі. Бізде шығарылатын шикізаттың сапасын әлі де арттыру қажет,-дейді басқарма төрағасы.
