Франция соты француз ультраоңшылдарының жетекшісі Марин Ле Пенді Еуропарламенттің ақшасын жымқыру ісі бойынша кінәлі деп тапты, деп хабарлайды BAQ.KZ тілшісі EuroNews-ке сілтеме жасап.
Оған мемлекеттік қызметке сайлануға тыйым салынды.
Францияда сот ультраоңшыл "Ұлттық бірлестік" партиясының жетекшісі Марин Ле Пенді Еуропарламент қаржысын ысырап еткені үшін кінәлі деп таныды.
Үкімге сәйкес, енді ол билік органдарына сайлауға түсе алмайды. Бұл шешім бірден күшіне енеді.
Марин Ле Пенмен бірге "Ұлттық бірлестіктен" Еуропарламентке мүше болған тағы сегіз депутат кінәлі деп танылды. Сонымен қатар, он екі парламенттік көмекші заңсыз табысты жасыру бойынша кінәлі деп танылды.
Тергеу нұсқасы бойынша, айыпталушылар көмекшілерді Еуропарламентке жалған түрде жұмысқа алған. Осылайша, олар еуропалық бюджетті партияның жұмысын қаржыландыру үшін пайдаланған. Сот олардың әрекетінен келген жалпы шығынды 2,9 миллион еуро деп бағалады.
Еске салайық, Марин Ле Пенге "Ресей президенті Владимир Путиннің досы" деген лақап атты украиналық бұқаралық ақпарат құралдары таққан еді. Бұл, әсіресе, оның Украинадағы соғыс басталғаннан кейінгі әрекеттеріне байланысты болса керек.
Дегенмен, 2024 жылғы наурызда Ле Пеннің Ресейге қатысты күтпеген қатаң сыни пікірі айтылғанын атап өткен жөн. Парламенттегі пікірталас кезінде ол Ресейдің Украинаға қарсы соғысын қатаң сынға алды.
0
1
0
0
0
