Нұр-Сұлтан, BAQ.KZ. «Азаматтарға арналған үкімет» жүргізушілер арасында өткен «Көлігіңді онлайн тіркеп, ұтып ал оған дөңгелек» атты байқаудың қорытындысын шығарды, деп хабарлады pavlodarnews.kz.
Естеріңізге сала кетейік, 1 тамызда жарияланған байқау бір айға созылды.
Байқау шарты бойынша қатысушылар өз көліктерін 2019 жылдың 1 қыркүйегіне дейін электрондық үкімет порталында онлайн тіркеуі тиіс болатын.
Атап өтер болсақ, бұл шара бұған дейін өткізілетін барлық шаралардың ішіндегі ең ауқымдысы болды - байқауға барлығы 4 696 адам қатысты.
Байқаудың басты демеушісі – Aster Auto ұсынған жүлделер автоәуесқойлар үшін нағыз пайдалы сыйлық болды. Олардың арасында дөңгелектер жиынтығы, сақтандыру полисі, көлік жуу абонементі (автокөлікті химиялық тазалау), бейнетіркегіш, май ауыстыру және толық баг жанар-жағармайға талон бар.
Жеңімпаз ЖСН-ны кездейсоқ генерациясы әдісімен анықталды. Нәтижесінде павлодарлық Сергей Смышляев, жамбылдық Майя Аманжолова, түркістандық Серік Сұлтанов, қызылордалық Әділет Асқаров және Алматы облысының тұрғыны Қуаныш Бегалиев бағалы сыйлық иелері атанды. Бас жүлдеге қойылған дөңгелек жиынтығына ақшалай сертификатты Қостанай қаласының тұрғыны Николай Потоцкий ұтып алды.
«Мен үшін бұл нағыз тосынсый болды. Ұйымдастырушылар қоңырау шалып, сіз ұтып алдыңыз дегенде сенер-сенбесімді білмедім. Мен үшін көлігімді еш қиындықсыз, жылдам әрі бірнеше минутта онлайн тіркегеннің өзі сыйлық еді.Ұйымдастырушыларға осындай пайдалы жүлде үшін рахмет айтқым келеді. Енді барлық қызметті тек онлайн әдіспен аламын», – деді Сергей Смышляев.
Айта кетейік, бұл «Азаматтарға арналған үкімет» өткізетін соңғы байқау емес. Он үшінші тамызда жаңа босанған аналар арасында «Анаға цифрлық көмек» атты байқау жарияланған болатын. Байқау шарты бойынша ата-аналар бала туу жөніндегі жәрдемақыға өтінішті онлайн рәсімдеп, балаларға арналған тауарлардың иесі атана алады.
