Өскеменде 70 жыл бұрын салынған жатақхананың төбесі опырылып түсті

Бұл туралы облыстық Төтенше жағдайлар департаменті хабарлады.  

Тынышпаев көшесіндегі 1950 жылы салынған жатақхананың төбе жабындысы құлағалы тұрған.



Оқиға орнына жедел жеткен құтқарушылар 2 тұрғынды эвакуациялады. 10 азамат сол жерден өз бетімен шығып үлгерген. Кинологиялық қызмет өкілдері Алеся атты иттің көмегімен жатақханада зардап шеккендердің бар-жоғын мұқият тексерді, - деп хабарлады ведомство өкілдері.


Белгілі болғандай, қаза болғандар мен зардап шеккендер жоқ. Төбе жабындысының құлаған аумағы шамамен 8 шаршы метрді құраған.

Алдын ала мәлімет бойынша, үйде 50 адам тұрады. Қазіргі уақытта оқиға орнын полиция қызметкерлері қоршап тастады. Сол жерде комиссия мүшелері жұмыс істеп жатыр.