Оралда даңқты қолбасшы, би-шешен, Сырым батыр туралы комикс жарық көрген еді. Бүгін "Білім-инновация" лицейінде туындының алғашқы таныстырылымы өтті, деп хабарлайды Оралдағы BAQ.KZ тілшісі.
Шара барысында оқушылар комикстің бейненұсқасын тамашалады.
Самара – Шымкент тас жолының бойында, Оралдан Ақтөбеге қарай шыққанда 89 шақырым жерде "Сырым шыққан төбе" деп аталатын жер бар. Атадан балаға мұра болған аңызға сенсек, он сегізінші ғасырдың аяғында отаршылдардың мұздай қаруланған әскері қазақ даласына жорыққа шығады. Азғантай жасақпен жаудың бетін қайтара алмайтынын түсінген Сырым Датұлы айлаға басады. Ол жаумен соғысуға жарамайтын адамдарды да атқа отырғызып, жылқыны айдап осы төбені айнала шауып жүруге бұйырады. Алыстан көкжиекті жапқан шаңды көрген басқыншылар қарақұрым қол келіп қалған екен деп, асып-сасып, кеткенше асығады. Міне, комиксте осы оқиға баяндалады.
ХХІ ғасырда балаларға кітап оқыту, соның ішінде өз тарихыңды таныту басты мәселенің бірі боп тұр. Біз сондықтан комикс жанрына көштік. Балалар оқиға желісін жеңіл жаттау үшін шығарма желісін өлеңмен өрдік. Оған оралдық ақын – Нұрлан Сәдір көмектесті. QR-код арқылы оқырмандар комикстің бейненұсқасымен де таныса алады, – дейді кітап авторы, жергілікті өлкетанушы Жантас Сафуллин.
Тайыр Жәнібек
