Оралда дзюдодан жасөспірімдер арасында Қазақстан Республикасының чемпионаты өз мәресіне жетті, деп хабарлайды BAQ.KZ olympic.kz-ке сілтеме жасап.
Жекелей жарыстар нәтижесі бойынша жалпы командалық есепте Шымкент қаласы (3 алтын, 2 күміс, 5 қола) көш бастады.
Алматы қаласының (3 алтын 1 күміс, 1 қола)спортшылары екінші орыннан көрінсе, Қарағанды облысының (3 алтын, 3 қола) құрамасы спортшылары үздік үштікті түйіндеді.
Чемпионаттың соңғы күнінде спортшылар аралас-командалық жарыс бойдынша үздік команданы анықтады.
Аралас-командалық жарыс нәтижесі бойынша Атырау облысының құрамасы Қазақстан чемпионы атанды. Финалда есе жіберген Алматы қаласының құрамасы күміс жүлдеге ие болса, Астана қаласының құрамасы мен Қарағанды облысының құрамасы қола жүлдені теңдей бөлісті.
Айта кетерлігі, аталмыш ел біріншілігіне Астана, Алматы және Шымкент қалалары мен 17 облыстан 2008-2009 жылдары туған 900-ге жуық жасөспірім спортшы қатысты. Оралда мәресіне жеткен Чемпионат аясында 2025 жылғы спорт маусымына жаңа құрама жасақталады.
Қазақстан чемпионатында төрт супервайзердің жетекшілігімен 24 төреші төрелік етті. Жарыстың әділ, әрі жоғары дәрежеде өтуін қамтамасыз ету мақсатында төрешілер бейне-қайталау жүйесімен жұмыс істеді.
