Нұр-Сұлтан, BAQ.KZ тілшісі. Қазақстандық жеңіл атлет Ольга Рыпакова 2020 жылы Жапонияның Токио қаласында өтетін Олимпиада ойындарына жолдама алды.
Кеше 30 маусым күні Алматыда өткен Қазақстан кубогында Рыпакова Олимпиада ойындарының нормативін орындады. Ол үш қарғып секіру сайысында 14.37 метрді бағындырды. Бұл көрсеткіш Олимпиада нормативін орындауға жеткілікті болды (14.20 метр). Екінші орынға 13.79 метрге секірген Мария Овчинникова орналасса, үшінші орынға 12.92 нәтижесімен Лаура Ахметова тұрақтады.
Осылайша, Ольга Рыпакова өзінің төртінші Олимпиадасына жолдама алып отыр. 34 жастағы спортшы бұған дейін 2008 жылы Бейжіңде күміс медаль, 2012 жылы Лондонда алтын, 2016 жылы Риода қола медальға ие болған.
