Нұр-Сұлтан, BAQ.KZ. Құрылысы қарқынды жүріп жатқан тұрғын үйлердің сапасына қатысты облыс әкімі Өмірзақ Шөкеев құрылысшылармен жүздесіп, жұмыс барысын тексерді.
Түркістан қаласы әкімшілік-іскерлік орталығында 89 көпқабатты тұрғын үйдің (350 мың ш.м., 5600 пәтер) құрылысы мемлекеттік бюджет есебінен жүргізілуде. Жыл қорытындысымен 7 қабатты 24 тұрғын (92,2 мың ш.м, 1452 пәтер) үйді пайдалануға тапсыру жоспарлануда. Оның ішінде: кезекте тұрған әлеуметтік осал топтарға және көпбалалы отбасыларға (450 пәтер), кезекте тұрған мемлекеттік қызметкерлеге кредиттік тұрғын үй (1002 пәтер) тапсыру жоспарланған.
Түркістан шаһарын көркейту, экологиялық жағдайды жақсарту үшін қарқынды жұмыс жүріп жатқаны белгілі. Аймақ басшысы сапаға мән беріп, уақыт үнемдеу мақсатында енгізілген гидроегу жұмыстарын тексерді. Абаттандыру және көгалдандыру жұмыстарын бақылады.
Түркістанда халықаралық тәжірибені қолдана отырып, ең озық технологиялар пайдаланылады. Арнайы сұйықтық шашылып, жеті күнде айнала жасыл желекке бөленеді.
Облыс орталығында көшелер мен демалыс орындарын көбейтіп, көгалдандыру жұмыстары қарқынды жүргізілуде. Қалада 32 сектор бойынша көгалдандыру жұмыстары жүріп жатыр. Аудан, қала және басқарма басшылары жауапты барлық аумақтарда 250 мың ағаш көшеті мен бұталар отырғызылды. Тұт ағашы, писсар өрігі, терек, арша, линден ағашы, қарағай, катальпа, талшын егілген.
157 862,38 ш.м. газон төселіп, 187,867 км суару жүйесі орнатылды. Қала бойынша 65 ұңғыма қазылып, аллеялар мен скверлер қолданысқа берілді. М. Пошанов, Байтанаев, Р.Сейтметов демалыс орындары және "Жеңіс" саябағы қайтадан жаңартудан өтіп, жаңа көрікке ие болды.
"Жасыл белдеу" бағдарламасы бойынша 97,9 га аумаққа 42068 дана ағаш егілді. "Қашқари" демалыс орнында 200 түрлі ағаш пен бұталы гүлді өсімдіктер отырғызылған. Қазіргі кезде Түркістан қаласының 19 көшесінде көгалдандыру мен абаттандыру жұмыстары іске асуда. Сонымен бірге, әл-Фараби мен Қазыбек би, Н.Төреқұлов көшесінде саябақ пен скверлер орнатылуда. Алдағы уақытта қолданысқа беріледі. Нәтижесінде, жалпы ұзындығы 111950 ш.м. аумақ шілде айының соңына дейін көгалданатын болады.
