Нұр-Сұлтан, BAQ.KZ. Алматы қаласының әкімі Бақытжан Сағынтаевтың тапсырмасы бойынша биыл қарашаның 2-нен бастап Алматыда қарттар мен балаларға үйде профилактикалық медициналық тексеру жүргізіледі. Бұл туралы Алматы қаласы өңірлік коммуникациялар қызметі хабарлады.
Алматы қаласы Денсаулық сақтау басқармасы басшысының міндетін атқарушы Жанар Мадеева атап өткендей, ТЖ режимі мен карантин кезінде профилактикалық тексерулер жүргізілмегендіктен, COVID-19-дың екінші толқынына дайындық аясында халықтың ең осал топтарына профилактикалық тексерулер ұйымдастыру туралы шешім қабылданды.
Біріншіден, бұл үлкен жастағы адамдар (65 жастан асқан), олардың арасында артериалды гипертензия, созылмалы обструктивті бронхит, қант диабеті және т. б. сияқты созылмалы аурулары бар науқастар көп.
Әрбір алғашқы медициналық-санитарлық көмек көрсету ұйымында жалпы тәжірибе дәрігері, невропатолог, кардиолог, отоларингологтан тұратын мультидисциплинарлық командалар құрылды, олар қарт адамдарды үйде қарап, қант, холестерин деңгейін анықтайды, ЭКГ жасайды. Бұл қажет болған жағдайда емдеуді түзетуге немесе стационарлық емдеу үшін көрсеткіштерді анықтауға мүмкіндік береді . Жалпы, егде жастағы 80 мыңға жуық адамды қамту жоспарлануда, - деп атап өтті ол.
Бұдан басқа, балалардың ұзақ уақыт бойы қашықтан оқып жатқандығын және емханаларға іс жүзінде бармайтындығын ескере отырып, Алматы әкімдігі 0-16 жас аралығындағы балаларды профилактикалық тексеруден өткізу туралы шешім қабылдады.
Алғашқы медициналық-санитарлық көмек бойынша (АМСК) балаларды профилактикалық тексеру үшін педиатр, невропатолог, окулист, отоларинголог, балалар хирургі дәрігерлерінен құралған мультидисциплинарлық командалар құрылды.
Қажет болған жағдайда талдау үйде жүргізіледі. Шамамен 100 мыңға жуық баланы қамту жоспарлануда. Әлеуметтік қорғалатын отбасылардағы балаларға, мүмкіндігі шектеулі балаларға баса назар аударылады.
Қазіргі уақытта АМСК ұйымдары нысаналы топтардың тізімдерін жасайды. Қабылдау кезінде және аулаларды аралау кезінде учаскелік дәрігерлер мен медбикелер жеке гигиена ережелерін қатаң сақтау, қолды жиі жуу, медициналық масканы қолдану ережелері, әлеуметтік қашықтық, балалардың адамдар көп жиналатын орындарға, үлкен ойын алаңдарына баруын болдырмау туралы тұрақты ақпараттық-түсіндіру жұмыстарын жүргізеді.
