Мүгедектік және асыраушысынан айырылғандарға 254 млрд теңгеден астам жәрдемақы төленді

Мүгедектік және асыраушысынан айырылғандарға 254 млрд теңгеден астам жәрдемақы төленді
394

Осы жылдың 7 айында қазақстандықтарға мүгедектік және асыраушысынан айырылу бойынша жәрдемақы түрінде 254 млрд теңгеден астам қаражат төленді деп хабарлайды BAQ.KZ.

Еңбек және халықты әлеуметтік қорғау министрлігінің мәліметінше, оның ішінде 2022 жылғы шілде айында республикалық бюджеттен мүгедектігі бойынша мемлекеттік әлеуметтік жәрдемақы төлеуге 28,8 млрд теңге, асыраушысынан айырылу жағдайы бойынша 8,6 млрд теңге бөлінген.

2022 жылғы 1 тамыздағы жағдай бойынша мүгедектік бойынша мемлекеттік әлеуметтік жәрдемақы алушылардың саны 530 мың, асыраушысынан айырылу жағдайы бойынша 179,4 мың адамға жетті.

Мүгедектік және асыраушысынан айырылу жағдайы бойынша мемлекеттік әлеуметтік жәрдемақылардың мөлшері мүгедектік тобына және себебіне, қайтыс болған (қаза тапқан) асыраушының асырауындағы адам санына, сондай-ақ тиісті қаржы жылына арналған «Республикалық бюджет туралы» заңда белгіленетін ең төменгі күнкөріс деңгейіне байланысты болады.

2022 жылғы 1 тамыздағы жағдай бойынша мүгедектігіне байланысты төленетін мемлекеттік әлеуметтік жәрдемақының орташа мөлшері 54 339 теңге, асыраушысынан айырылу жағдайы бойынша төленетін жәрдемақы – 47 763 теңге.

Қысқа да нұсқа. Жазылыңыз telegram - ға

Фото: BAQ.KZ
Өзгелердің жаңалығы