Министр мектепте домбыра сабағы қалай жүрілетінін айтты

4 Шілде 2021, 21:03
8099
Бөлісу:
Министр мектепте домбыра сабағы қалай жүрілетінін айтты

Нұр-Сұлтан, BAQ.KZ. Қазақстан Республикасы Білім және ғылым министрі Асхат Аймағамбетов ел тұрғындарын бүгінгі Ұлттық домбыра күні мерекесімен құттықтады. Бұл туралы министр өз парақшасында жазды.

Бүгін Қазақстанда домбыра күні тойланып жатыр. Мерекеге орай елордада Мемлекет басшысы Қасым-Жомарт Тоқаевтың қатысуымен іс-шара өтті. Президент сөз барысында домбыраның қазақ халқы үшін қасиетті аспап екенін, ол туралы аңыздар жазылып, ұрпақтан-ұрпаққа беріліп келе жатқанын атап өтті. Домбыраның салт-дәстүріміз бен мәдениетімізде, тарихымызда алатын орны ерекше екені белгілі. Құрманғазы, Дәулеткерей, Махамбет, Тәттімбет, Дина Нұрпейісова сынды ата-бабаларымыздың күйлері көпшілікке мәлім - дейді министр.

Ол халқымыздың ең басты музыкалық аспабы тек күй төгіп қана қоймай, сонымен қатар бұрын да, қазір де танымал болған айтыскер ақындарға шабыт беретінін атап өтті.

Сүйінбай Аронұлы, Біржан сал, Сара Тастанбекқызы және басқа да ақындар қазақ мәдениетін насихаттауға зор үлес қосты. Қазір Қазақстан Президенті ұлттық бірегейлікті нығайтуға ерекше назар аударып отыр. Сондықтан Қасым-Жомарт Тоқаев бұған дейін мектептерде домбыраны үйренудің қажеттігін айтқан болатын - деді Асхат Аймағамбетов.

Ол орта білім беруге домбыраны енгізудің жақсы бір үлгісі Назарбаев зияткерлік мектебі болғанын айтты.

Оқушылар бір оқу жылының ішінде домбырада ойнауды үйренеді. Одан әрі жетілдіргісі келетіндер оны қосымша сабақтарда жалғастыра алады. Біз бұл тәжірибені орта мектептерде таратуды қарастырып отырмыз. Бірақ ол қосымша жүктеме әкелмей, жалпы оқу жүктемесінің ішінде іске асырылатын болады. Сонымен қатар Мемлекет басшысы биылдан бастап елімізде мемлекеттік тапсырыс бойынша шығармашылық үйірмелер жұмыс істей бастағанын атап өтті. Әртүрлі үйірмелермен қатар, балалар домбыра үйірмелеріне де тегін қатыса алатындай жағдай жасалып жатыр - деді министр.
Өзгелердің жаңалығы