Нұр-Сұлтан, BAQ.KZ. Қазақстан Республикасының Сауда және интеграция министрі Бақыт Сұлтанов Өзбекстан мен Қазақстан арасындағы келіссөздер жайлы айтты.
Вице-премьер Роман Склярдың төрағалығымен делегация құрамында Ташкент қаласындамын. Күні бойы ынтымақтастықты кеңейту перспективалары мен проблемалық мәселелерді жоғары деңгейде талқыладық. Біз үшін Өзбекстан - өңірдегі негізгі сауда серіктес. Осы жылы өзара тауар айналымын $5 млрд дейін жеткізуді жоспарладық, бірақ пандемияға байланысты оны жасау қиынға соғуда. Тоғыз айда өзара сауда көлемінің төмендеуі 16,5%-ды құрады. Дегенмен, біздің экспорт бір пайыз шамасында ғана төмендеді, ал Өзбекстаннан импорт көлемі 40%-ға төмендеді. Әріптестерімізге Қазақстанның өзбек нарығына жеткізе алатын тағы 64 тауар позициясын ұсындым. Бұл әртүрлі құбырлар, металл илегі, автомобильдер, химия және мұнай-химия өнімдері, машина жасау, фармацевтика және тамақ өнеркәсібі өнімдері - дейді ол.
Сонымен қатар, ол өткен жылы Ташкентте ашылған «KazakhExport» кеңсесі экспортты ілгерілетуге көмектеседі деп сенетінін айтты.
Компания кредиттік тәуекел бойынша өзінің сақтандыру қорғанысын ұсына отырып, қазақстандық тауарларды сатып алу үшін жергілікті банктерден экспорттық саудалық қаржыландыруды тарта алады. Бүгін «KazakhExport» пен өзбекстандық «Кишлокурилишбанк» арасындағы $3 млн сауда операцияларын қаржыландыруды қарастыратын ынтымақтастық туралы келісімге қол қойылды. Бірақ біз тек сауда жасап қана қоймай, сыртқы нарықтарға шығуда да ынтымақтасқымыз келеді. Бұл үшін екі ел де халықаралық сауда-экономикалық ынтымақтастық орталығын (ХСЭЫО) құруға бастамашы болды. Біз ХСЭЫО-ын іргелес инфрақұрылыммен шекаралас көтерме-бөлшек сауда объектілерінің шоғырлануы ретінде ғана емес, сондай-ақ Еуразиялық тауар өткізу жүйесінің маңызды сауда-логистикалық орталығы ретінде де көріп отырмыз. Біздің КТО мен өзбек АЛО да осы үлкен жүйенің құраушысы болуға тиіс - деді министр өз жазбасында.
Оның сөзіне қарағанда, ХСЭЫО-ын іске қосылу әлі алыс болғандықтан, оның кейбір элементтерін шекаралас КТО-АЛО-да сынақтан өткізу ұсынылды.
ХСЭЫО іске қосылған кезде біз тауарлардың қозғалысының барлық технологиялық схемасын құра аламыз, осал жерлерді анықтап, оларды түзете аламыз. Біз ең бастысы – барлық интеграцияланған желі шеңберінде ауыл шаруашылығы өнімінің сапа стандарттарын біріздендіргіміз келеді және «жасыл дәліз» қағидаттары бойынша тауарлардың транзиттік қозғалысын қамтамасыз ету үшін КТО аумағында фито-санитариялық бақылау, кедендік рәсімдер мен өзге де қажетті шаралар жүргізуді қамтамасыз еткіміз келеді. Жалпы, ХҚКО-ға ұқсас бірыңғай терезе қағидаты бойынша барлық шекара маңы қызметтерінің Орталықтандырылған жұмыс тәжірибесін жинақтау. Келіссөздерде талқыланған маңызды мәселе - кедергілерді жою. Әріптестермен Ташкенттің 2009 жылғы 20 қарашадағы ТМД тауарларының шығарылған елін анықтау ережелеріне қосылуын, Өзбекстанның акциздік саясатын ырықтандыру процесін және өзбек нарығында қазақстандық брендтерді пайдалана отырып шығарылған контрафактілік ұн өнімдерінің жиі кездесетін жағдайлары бар. Жалпы, екі ел де экономикалық және сауда ынтымақтастығын барынша кеңейтуге ниетті. Екі елдің өндірістік кооперация жобаларына нақты қызығушылығы бар - деді министр.
