Мемлекеттік шекарада адамдар мен көліктер қалай тексерілетіні белгілі болды, деп хабарлайды BAQ.KZ тілшісі.
Бұл туралы Ұлттық қауіпсіздік комитеті төрағасының орынбасары – Шекара қызметінің директоры Ерлан Алдажұманов мәлімдеді.
Айтуынша, шекара бекетінде адамдар мен көліктерді тексерудің арнайы нормативі бар.
Кез келген автокөлік бекетінде адамды тексеруге 3 минут уақыт беріледі. Ал жеңіл автокөлікті тексеруге 15 минутқа дейін, жүк көлігін тексеруге – 30 минут және жолаушылары көп автобусты тексеруге 45 минут уақыт бар, - деп атап өтті Ерлан Алдажұманов Сенаттың кулуарында БАҚ өкілдеріне берген сұхбатында.
Сондай-ақ нормативте уақыт барынша қысқартылған деп отыр.
Заңнаманы бұзбас үшін бір адамға 1 минут уақыт кетеді. Ақпараттық жүйе адамның жеке деректерін өңдейді. Осы нормативті ұстану қажет. Егер жеңіл автокөлікті 10-15 минут тексерсек, егер көліктен қандай да бір тыйым салынған заттар анықталса, көлікті одан әрі дұрыстап тексеру үшін қозғалысқа кедергі келтірмейтіндей шеткері жерге қойылады, - деп түсіндірді Шекара қызметінің директоры.
Бұған дейін хабарлағанымыздай, Қазақстанның мемлекеттік шекарасының 16 пайызы ғана арнайы техникалық күзет құралдарымен күзетіледі.
