Нұр-Сұлтан, BAQ.KZ тілшісі. Мемлекеттік сатып алу процесі толық цифрландырылады. Бұл туралы ОКҚ алаңында өткен брифингте Қаржы вице-министрі Дәурен Кеңбейіл мәлімдеді.
Бизнес-процестерді автоматтандыру арқылы мемлекеттік сатып алудың барынша ашықтығы мен айқындығы қамтамасыз етілді. Мемлекеттік сатып алулардың 100%-ы және олардың жоспарлаудан бастап, төлемге дейін рәсімдері электронды форматқа ауыстырылды, - деді Қаржы вице-министрі.
Сонымен қатар камералдық бақылау енгізілді, ол тексеру объектісіне бармай-ақ онлайн-режимде жүзеге асырылады.
Сондай-ақ құқық қорғау органдарына толық қолжетімділік қамтамасыз етілді. Толық автоматтандыру қоғамның мемлекеттік сатып алудың барлық рәсімдеріне, оның ішінде шағымдану және бақылау процесіне қол жеткізуіне жол ашты, - деп түсіндірді Қаржы вице-министрі Дәурен Кеңбейіл брифингте.
Оның мәліметінше, 2021 жылғы 15 қарашада мемлекеттік сатып алу мәселелері бойынша бір көзден тікелей шарт жасасудың 4 негізін қысқартуды көздейтін заң қабылданды. Сатып алуды бәсекелестік тәсілдермен басым жүзеге асыру туралы талап белгіленген, сондай-ақ тапсырыс берушінің бірінші басшыларының бір көзден сатып алуды жүзеге асырғаны үшін жауапкершілігі көзделген.
